कञ्चनपुर । सीमावर्ती क्षेत्रमा बर्डफ्लु देखिएपछि कञ्चनपुरमा उच्च सतर्कता अपनाइएको छ ।  भारतको उत्तराखण्डसहित आसपासका क्षेत्रमा बर्डफ्लु सङ्क्रमण देखिएपछि कञ्चनपुरमा उच्च सतर्कता अपनाइएको हो ।  

जिल्ला बर्डफ्लु रोग नियन्त्रण समितिले सीमानाकामा पन्छी तथा पन्छीजन्य पदार्थको आयात–निर्यातमा कडाइ गर्नुका साथै सीमावर्ती पालिकामा सचेतनामूलक कार्यक्रम सञ्चालन गरिरहेको जनाएको छ । समितिले कञ्चनपुरको पुनर्वास, बेलौरी, बेलडाँडी, दोधाराचाँदनी र भीमदत्त नगरपालिका १, २ र १० को सीमावर्ती क्षेत्रबाट पन्छी तथा पन्छीजन्य सामग्रीको आयात र ओसारपसारलाई पूर्ण रूपमा निषेध गरेको छ।

सीमावर्ती क्षेत्रमा सङ्क्रमण देखिएकाले नेपालमा फैलिन नदिने उद्देश्यले सचेतना अभियान सञ्चालन गर्नुका साथै सतर्कता अपनाइएको जिल्लास्थित भेटेरिनरी अस्पतालले जनाएको छ ।  भेटेरिनरी अस्पतालका अनुसार भारतसँग सीमा जोडिएका दोधराचाँदनी, बेलौरी, पुनर्वास, भीमदत्त नगरपालिका र बेलडाँडी गाउँपालिमा बर्डफ्लु नियन्त्रण तथा प्रतिबन्धसम्बन्धी सचेतनामूलक कार्यक्रम गरिएको छ । 

आफूले पालेका कुखुरामा यस्ता लक्षण देखिएमा तत्काल पशु विज्ञ वा भेटेरिनरी अस्पताल तथा पशु सेवा विज्ञ केन्द्रमा जानकारी गराउन सबै किसानलाई आग्रह गरिएको छ ।