काठमाडौँ । सरकारले किसानलाई वितरण गर्न पठाएको अनुदानको २ सय बोरा मल गोदाममा लुकाएर राख्ने व्यापारी पक्राउ परेका छन् । 

अनुदानको मल लुकाएर आफ्नो गोदाममा भण्डार गर्ने उदयपुरको कटारीस्थित आशुतोष ट्रेडर्स एण्ड जनरल स्टोर्सका सञ्चालक दिलीप चौधरी  पक्राउ परेका हुन् । चौधरीलाई पक्राउ गरेर मंगलबार जिल्ला अदालतबाट ६ दिनको म्याद लिएर अनुसन्धान अघि बढाइएको इलाका प्रहरी कार्यालय कटारीका डिएसपी कमल बजगाईँले जानकारी दिनुभएको छ ।

जिल्ला प्रशासनको बजार अनुगमन टोलीले भदौ १२ गते मा अनुगनमन गर्दा चौधरीले सञ्चालन गरेको गोदाममा अनुदानको मल फेला परेको हो । अनुदानको मल अवैध तरिकाले लुकाएर राखेको पाइएपछि शिलबन्दी गरेर अनुसन्धान अघि बढाइएको प्रहरीले जनाएको छ । 

चौधरीको गोदामबाट जफत गरिएको मल सर्वदलीय छलफलपछि अहिले किसानलाई वितरण गर्ने काम अघि बढाइएको छ ।