काठमाडौँ ।  त्रिभुवन विश्वविद्यालयको उपकुलपतिमा प्रा डा केशरजङ्ग बराल नियुक्त हुनुभएको छ । विश्वविद्यालयका कुलपति एवम् प्रधानमन्त्री पुष्पकमल दाहालले बिहीबार त्रिविको रिक्त उपकुलपति पदमा बराललाई नियुक्त गर्नुभएको उहाँको सचिवालयले जनाएको छ । 

शिक्षा, विज्ञान तथा प्रविधिमन्त्री अशोककुमार राई नेतृत्वमा रहेको उपकुलपति छनोट तथा सिफारिस समितिले बरालसहित चित्रबहादुर बुढाथोकी र टङ्कनाथ धमलाको नाम सिफारिस गरेको थियो । उपकुलपति पदका लागि दरखास्त दिएका ४३ मध्ये प्रस्तुतीकरण र अन्तर्वार्ताका लागि १४ जना छानिएकामा प्रस्तुतीकरण एवं अन्तर्वार्तापछि नियुक्तिका लागि तीन जनाको नाम सिफारिस गरिएको थियो । शैक्षिक योग्यताको आधार, तालिम, अनुसन्धानमूलक लेख, अन्तर्वार्ता एवं प्रस्तुतीकरणका आधारमा नियुक्ति गरिएको जनाइएको छ । प्रा डा बराख फाइनान्सका विज्ञ हुनुहुन्छ । 

पोखरा विश्वविद्यालयका पूर्वउपकुलपति प्राडा बराल मगर संस्कृतिका बारेमा पनि उत्तिकै जानकार हुनुहुन्छ । उहाँले ‘पाल्पा, तनहुँ र स्याङ्जाका मगरहरूको संस्कृति’ नामक अनुसन्धानमूलक पुस्तक प्रकाशित गरिसक्नुभएको छ ।  बराल, मगर समुदायको एक प्रतिष्ठित प्राज्ञिक व्यक्तित्व हुनुहुन्छ ।  त्रिभुवन विश्वविद्यालय, पृथ्वीनारायण क्याम्पसमा प्राध्यापनरत बरालले चीन, भारत, अमेरिका, भुटान लगायतका देशका विभिन्न विश्वविद्यालयमा भिजिटिङ प्रोफेसरका रुपमा कार्यरत हुनुहुन्छ ।