तनहुँ । गण्डकी प्रदेशको गौरव आयोजनाको सडक कालोपत्र शुरु भएको छ । तनहुँको मानपुर–डेडगाउँ–बुलिङटार सडकमा ट्र्याक खुलेको २९ वर्षपछि कालोपत्र शुरु भएको हो । 

मुस्ताङको कोरोलादेखि नवलपुरको त्रिवेणी जोड्ने छोटो दूरीको त्यो सडकअन्तर्गत तनहुँ खण्डमा पहिलो चरणमा कालोपत्र थालिएको पूर्वाधार विकास कार्यालय तनहुँले जनाएको छ । 

अस्फाल्ट प्रविधिबाट तनहुँ खण्डमा कालोपत्र सुरु गरेको कार्यालयका प्रमुख कृष्ण आचार्यले जानकारी दिनुभयो । उहाँका अनुसार सडक स्तरोन्नतिका लागि सोमबारदेखि फागुन २२ गतेसम्म त्यो सडक बन्द गरिएको छ ।

विसं २०५१ मा ट्र्याक खुलेको त्यो मार्गमा कालोपत्र हुने भएपछि स्थानीयवासी खुशी भएका छन् । त्यस खण्ड स्तरोन्नतिका लागि विसं २०७७ मङ्सिर ५ गतेदेखि काम थालिएको थियो । भौतिक पूर्वाधार विकास मन्त्रालयमार्फत््बाइस करोड ८५ लाख ४१ हजार ७ सय ९३ रुपैयाँ लागतमा कालोपत्र शुरु गरिएको आचार्यले बताउनुभयो । 

३५ करोड १४ लाख ७४ हजार १ सय ९ रुपैया लागत अनुमान गरिएकामा हेटौँडास्थित सपना निर्माण सेवाले  १२ करोड २९ लाख ३२ हजार ३ सय १६ रुपैयाँ मा कालोपत्रको ठेक्का पाएको थियो । सडक कालोपत्रको सम्झौता विसं २०७६ फागुन ७ गते भएको थियो । ठेक्का भएलगत्तै नेपालमा कोरोना महामारी शुरु भएको र लकडाउनका कारण काम शुरु हुन नसकेको निर्माण कम्पनीले जनाएको छ । 

तनहुँको घिरिङ गाउँपालिका–४ मानपुरबाट शुरु भएर डेढगाउँको सिमानासम्मको एघार किलोमिटर खण्डमा सडक कालोपत्र हुने पूर्वाधार विकास कार्यालयले जनाएको छ ।  त्यो सडकको चौडाई सात मिटर रहनेछ । सडकमा पाँच मिटरको कालोपत्र हुनेछ भने एक मिटरको नाला निर्माण हुनेछ । 

कालोपत्र सम्पन्न भएपछि यस क्षेत्रकै समृद्धिको ढोका खुल्ने घिरिङ गाउँपालिकाका अध्यक्ष होमबहादुर थापाले बताउनुभयो ।