रुकुम । रुकुम पश्चिममा भूकम्प पीडितका लागि २६ हजार ७ सय ७ वटा अस्थायी आवास निर्माण गरिएको छ । ५ हजार ६ सय ३७ अस्थायी आवास  निर्माणाधीन छन् ।  

अस्थायी आवास निर्माणका लागि  ७५ करोड ११ लाख ५० हजार रुपैयाँ निकासा भएको थियो । जिल्ला प्रशासनले  सार्वजनिक गरेको तथ्याङ्कअनुसार आठविसकोट नगरपालिकामा सबैभन्दा बढी ८ हजार ८ सय ९८ वटा अस्थायी आवास निर्माण भएका छन् । चौरजहारी नगरपालिकामा ५ हजार ५ सय ६३, मुसीकोट नगरपालिकामा ६ सय ६६, सानीभेरी गाउँपालिकामा ६ हजार ६ सय ७५, त्रिवेणी गाउँपालिकामा ३ हजार २ सय ६४ र बाँफिकोट गाउँपालिकामा २ हजार ६ सय  वटा अस्थायी आवास निर्माण भएका छन् ।

चौरजहारी नगरपालिकामा  १५ करोड ६९ लाख ७४ हजार, आठविसकोट नगरपालिकामा २४ करोड ३३ लाख, मुसीकोट नगरपालिकामा ३ करोड ८६ लाख ७५ हजार, सानीभेरी गाउँपालिकामा १४ करोड ३३ लाख, त्रिवेणी गाउँपालिकामा १० करोड २८ लाख ७५ हजार र बाँफिकोट गाउँपालिकामा ६ करोड  ६० लाख २५ हजार रुपैयाँ  भूकम्प पीडितको खातामा रकम जम्मा भएको सहायक प्रमुख जिल्ला अधिकारी प्रवेश बडुवालले जानकारी दिनुभएको छ ।