रुकुम । रुकुमपश्चिममा २९ हजार १ सय ३३ भूकम्प पीडितले अस्थायी आवास निर्णाण गर्न पहिलो किस्ता प्राप्त गरेका छन् । 

सहायक प्रमुख जिल्ला अधिकारी प्रवेश बढुवालका अनुसार कूल ३१ हजार ६ सय २० का लागि पहिलो किस्ता बापतको रकम निकासा भइसकेको छ । 

जिल्लाका  ६ वटै पालिकाका २९ हजार १ सय ३३ भूकम्प पीडितले पहिलो किस्ता बापत २५ हजार रुपैयाँका दरले रकम प्राप्त गरेका हुन् । उहाँका अनुसार सबै भन्दा बढी आठबीसकोट नगरपालिकाका नौ हजार सात सय ३२ र सबैभन्दा कम मुसिकोट नगरपालिकामा १ हजार ५ सय ४७ ले पहिलो किस्ता बापत रकम प्राप्त गरेका छन् । 

सानीभेरी गाउँपालिकामा ५ हजार ७ सय ६१, त्रिवेणी गाउँपालिकामा ४ हजार १ सय १५, चौरजहारी नगरपालिकामा ६ हजार २ सय ७९ र बाँफीकोट गाउँपालिकामा १ हजार ६ सय ९९ भूकम्प पीडितले अस्थायी आवास निर्माणका लागि पहिलो किस्ता वापतको रकम प्राप्त गरेको बढुवालले जानकारी दिनुभएको छ ।

बढुवालका अनुसार ६ वटै स्थानीय तहमा हालसम्म  २५ हजारका दरले ७२ करोड ८३ लाख २५ हजार रुपैयाँ भूकम्प पीडितलाई बितरण गरिएको छ । जिल्ला विपद् व्यवस्थापन कोषबाट भने ३१ हजार ६ सय २० भूकम्प पीडितको लागि स्थानीय तह विपद् जोखिम न्यूनीकरण कोषमा ७९ करोड ५ लाख रुपैयाँ पठाएको छ । 

जिल्लामा हालसम्म  २४ हजार ७ सय २६ अस्थायी आवास निर्माण सम्पन्न भएका छन् । ५ हजार ९ सय ७६ अस्थायी आवास निर्माणको चरणमा रहेको सहायक प्रमुख जिल्ला अधिकारी बढुवालले जानकारी दिनुभयो ।  जिल्ला अझै २ हजार ४ सय ८७ भूकम्प पीडितले अस्थायी आवास निर्माण गर्न पहिलो किस्ता पाउन बाँकी छ ।