काठमाडौँ । पूर्वसभामुख एवं नेकपा माओवादी केन्द्रका उपाध्यक्ष कृष्णबहादुर महरा सुन तस्करी प्रकरणमा बयान दिन सिंहदरबार जानुभएको छ । 

पूर्वसभामुख महरा विद्युतीय सिगरेट (भेप) मा लुकाएर ल्याएको सुन प्रकरणमा बयानको लागि बिहीबार सिंहदरबार जानुभएको हो। सुन तस्करी छानविन समितिको कार्यालय सिंहदरबारमा छ । छानविन समितिले बोलाएपछि पूर्वसभामुख महरा बयानको लागि त्यहाँ जानुभएको स्रोतले बताएको छ । 

भेपमा लुकाएर तस्करी भएको ९ किलो सुन प्रकरणमा संलग्न चिनियाँ नागरिकसँग महराको बाक्लो सम्पर्क र सम्बन्ध रहेको पाइएको थियो । नेपाल प्रहरीको केन्द्रीय अनुसन्धान ब्यूरो (सीआईबी)ले त्यही प्रकरणमा पूर्वसभामुख महराका छोरा राहुललाई पक्राउ गरेको थियो । त्यसबेला पूर्वसभामुख महरालाई भने कागजमा बयान गराएर छाडिएको थियो ।  पूर्वसभामुख महराले त्यसबेला सीआईबीसँग ती चिनियाँ नागरिकलाई आफूले फलफूल व्यवसायीका रुपमा मात्र चिनजान भएको बताउनुभएको थियो ।