पोखरा । सूर्यदर्शन सहकारीको रकम ठगी एवं अपचलको आरोपमा एमालेकी नेतृ एवं गण्डकी प्रदेश सभाकी पूर्व सदस्य मीना गुरुङ पक्राउ पर्नुभएको छ ।  एमालेको मजदुर संगठन जिफन्टमा लामो समय काम गर्नुभएकी पोखरा–१२ रानीपौवा निवासी ६३ वर्षीया गुरुङ प्रहरीको फरार सूचीमा हुनुहुन्थ्यो ।

उहाँलाई  प्रहरीले मंगलबार निवासबाटै पक्राउ गरेको हो ।

उहाँलाई बुधबार जिल्ला अदालत कास्कीमा पेश गरिने कास्की प्रहरीका प्रवक्ता बसन्तकुमार शर्माले जानकारी दिनुभयो । पक्राउ पर्नुभएकी गुरुङलाई सहकारी ठगीको अभियोग लगाइएको छ ।

सहकारीको ठगी सम्बन्धमा आइतबार आभियोग पत्र दर्ता भएका ४४ जनामध्ये एमाले नेतृ गुरुङ समेत हुनुहुन्छ । सूर्यदर्शन सहकारी स्थापना कालमा तत्कालिन तर्दथ समितिको सदस्य र पछि सञ्चालक समितिको उपाध्यक्ष भई काम गर्नुभएकी गुरुङ ०७४ सालमा गण्डकी प्रदेश सभामा समानुपातिकबाट सांसद बन्नुभएको थियो । 

०७९ को निर्वाचनमा भने उहाँ कास्की २ ख बाट पराजित हुनुभएको थियो ।