सिरहा । जिल्लाको सुखिपुर नगरपालिका–३ सलमपुरमा ग्यास लिक भएर आगलागी हुँदा ७ लाख  रुपैयाँ भन्दा बढीको क्षति भएको छ । 

शनिबार राति अचानक ग्यास सिलिण्डर बिष्फोट भई आगलागी हुँदा किराना पसलमा रहेका सामान, रिचार्ज कार्ड, नगदसहित ७ लाल रुपैयाँ भन्दा बढीको क्षति भएको जिल्ला प्रहरीले जनाएको छ ।

स्थानीय सुलिन्दर दासको एक तले पक्की घरमा भरत साहले सटर भाडामा लिई किराना पसल र प्रिमा ग्यास डिलर सञ्चालन गर्दै आएका थिए । साहले पसल बन्द गरी घर गएको बेलामा  ग्यास चुहावट भई अचानक आगलागी हुँदा  छ थान ग्यास विष्फोट हुनुका साथै साहको किराना पसल र त्यही घरको अर्को सटरमा अनिलकुमार दासको किराना पसलमा पनि आगलागी भएको जिल्ला प्रहरी कार्यालयका प्रवक्ता, प्रहरी नायव उपरीक्षक वीरेन्द्र पासमानले जानकारी दिनुभयो । 

भरत साहको डिलरमा रहेको छ थान ग्यास, सहित किराना सामग्री, एनसेल र एनटिसीको २ लाख रिचार्ज कार्ड, नगद ५० हजार गरी  ५ लाख ५५ हजार रुपैयाँ मूल्य बराबरको क्षति भएको प्रारम्भिक अनुमान गरिएको प्रहरी नायव उपरीक्षक पासमानले बताउनुभयो । उहाँका अनुसार अनिलकुमार दासको किराना पसलमा आगलागी हुँदा चामल, गँहु, खाने तेल लगायत २ लाख २३ हजार रुपैयाा बराबरको क्षति किराना सामग्री क्षति भएको अनुमान गरिएको छ ।

इलाका प्रहरी कार्यालय महेशपुर पतारीबाट खटिएको प्रहरी टोली, गोलबजार नगरपालिकाको पानी दमकल र स्थानीयको सहयोगमा शनिबार राति १० बजे आगो पूर्ण रूपमा नियन्त्रणमा आएको बताउँदै मानवीय क्षति भने नभएको प्रहरी नायब उपरीक्षक पासमानले जानकारी दिनुभयो । घटनाबारे प्रहरीले थप अनुसन्धान गरिरहेको छ ।