सुनसरी । सुनसरीको बराहक्षेत्र नगरपालिकामा हात्तीको आतङ्क सुरु भएसँगै स्थानीय त्रसित बनेका छन् । कोशी टप्पु वन्यजन्तु आरक्षबाट दैनिक रुपमा आउने जङ्गली हात्ती र अर्नाको आतङ्कले यहाँका स्थानीय त्रसित बनेका हुन् । 

जिल्ला प्रशासन कार्यालयमा आज भएको जिल्ला विपत् व्यवस्थापन समितिको बैठकमा यही असोज १२ र १३ गते आएको बाढीको त्राससँगै अहिले हात्तीको आतङ्क पनि थपिएको बराहक्षेत्र नगरपालिकाका प्रमुख रमेश कार्कीले बताउनुभयो । सप्तकोशी नदीमा आएको बाढीका कारणले आरक्षमा रहेका जङ्गली जनावर बस्तीमा पस्न थालेका उहाँले जानकारी दिनुभयो ।

नगरप्रमुख कार्कीले बाढीबाट पीडित धान र तरकारी किसान आरक्षबाट आउने हात्तीको आक्रमणबाट त्रसित हुन थालेका बताउँदै दैनिक आउने हात्ती र अर्नाले करिब पाँच सय बिघा धान र तरकारी बाली नष्ट गरेको जानकारी दिनुभयो । 

हात्ती नियन्त्रणका लागि सरोकार भएका निकायले समन्वय गर्नुपर्ने माग गर्दै नगरप्रमुख कार्कीले पीडित परिवारलाई क्षतिपूर्तिको व्यवस्था गर्न सङ्घीय सरकारसँग आग्रह गर्नुभयो । आरक्षमा रहेका अर्ना तथा हात्ती भारतको सुपौल जिल्लाको भीमनगर नजिकै कटैयापावर हाउस वरपरका बस्तीमा आतङ्क मचाइरहेकाले तत्काल उद्धारका लागि पहल गर्न पनि उहाँले आग्रह गर्नुभयो ।

बाढी पीडित परिवारलाई तत्काल राहतसामग्री उपलब्ध गराउन थालिएको बताउँदै पुनःस्थापनाको पहल पनि भइरहेको प्रमुख जिल्ला अधिकारी रामचन्द्र तिवारीले उल्लेख गर्नुभयो । जिल्लामा बाढी पीडितको तथ्याङ्क सङ्कलन भइरहेकाले स्थानीय तहसँगको समन्वयमा तत्काल पीडित परिवारलाई खाना र अस्थायी बासको व्यवस्था गरिएको उहाँले जानकारी दिनुभयो ।