काठमाडौँ ।  प्रेस चौतारी नेपालले ‘अध्यक्ष गणेश बस्नेतलाई अनलाइनमा प्रकाशित समाचारको विषयलाई लिएर  पक्राउ गर्न खाजेको भन्दै आपत्ति जनाएको छ । 

प्रेस चौतारीले ‘काठमाडौंको बागबजारस्थित होटल हार्दिकमा संगठनको कार्यक्रम भइरहेको बेला बिहीबार दिउँसो ४ बजेतिर नेपाल प्रहरीको केन्द्रीय साइबर व्यूरोको अधिकारी भन्दै सादा पोशाकका प्रहरीले अध्यक्ष बस्नेतलाई पक्राउ गर्न खोजेको’ आपत्ति जनाएको हो । 

कार्यक्रममा उपस्थित पत्रकारहरुले सामूहिक रुपमा प्रतिवाद गरेपछि प्रहरीको टोली फर्किएको प्रेस चौतारीका महासचिवले बिहीबार विज्ञप्ति जारी अध्यक्ष बस्नेतलाई पक्राउ गर्न गरिएको प्रयासप्रति भत्सना गर्नुभएको हो । 

‘समाचारमा चित्त नबुझे प्रेस काउन्सिल नेपालमा उजुरी दिने कानुनी व्यवस्था रहेको छ । यसो हुँदाहुँदै पनि जनता टाइम्स डटकममा समाचार लेखेकै कारण अपराधी जसरी सुनियोजित रुपमा पक्राउ गर्न खोजिनु स्वतन्त्र प्रेस र देशको कानुनको समेत ठाडो उल्लंघन रहेको प्रेस चौतारी नेपालको ठहर छ’  महासचिवले जारी गर्नुभएको विज्ञप्तिमा भनिएको छ– ‘यस घटनाको निन्दा र भत्र्सना गर्दै घटनाको छानविन गर्न मागसहित आगामी दिनमा यस्ता हर्कत नदोहोर्याउन हामी चेतावनी दिन चाहन्छौं । अन्यथा, त्यसबाट उत्पन्न हुने परिस्थितिको स्वयम् सम्बन्धित निकायले लिनुपर्नेतर्फ बेलैमा सचेत गराउन पनि चाहन्छौँ ।’

बस्नेतलाई पक्राउ प्रयासप्रति नेपाल पत्रकार महासंघ, समाजवादी प्रेस संगठन, नेपाल र नेपाल प्रेस यूनियनले समेत आपत्ति जनाएको छ ।