स्याङ्जा । पुतलीबजार नगरपालिका–१३ हीरापाटाका एक सय ५० घरमा ‘एक घर–एक धारा’ योजनाअन्तर्गत धारा जडान गरिएका छन् ।

खानेपानी तथा सरसफाइ डिभिजन कार्यालयका प्रमुख हरिप्रसाद तिमिल्सिनाका अनुसार लामो समयदेखि खोल्सा तथा कुवाको पानी प्रयोग गर्दै आएका स्थानीयका घरमा गरिएको हो । दरौँखोला किनारको मूलबाट  पानी तानेर वितरण गरिएको हो ।

‘सङ्घीय सरकारअन्तर्गत आव २०७४ र ७५ मा निर्माण शुरु भएको उक्त आयोजना कार्यान्वयनका लागि गण्डकी प्रदेशमा हस्तान्तरण भई आएको थियो’ उहाँले भन्नुभयो– ‘निर्माण शुरु भएदेखि क्रमिक रूपमा निर्माण सम्पन्न हुँदाको समयसम्म करिब ४ करोड रुपैयाँ खर्च भएको छ ।’ सङ्घीय सरकारबाट विनियोजन भएको ३ करोड ५४ लाख र स्थानीयको जनश्रमदान  ४१ लाख गरी ३ करोड ९५ लाख रुपैयाँको लागतमा निर्माण सम्पन्न भएको हो ।

‘सञ्चालनमा आएको खानेपानी आयोजना गुणस्तर तथा शुद्धीकरणको नमूनाका रूपमा रहेको छ’ उहाँले भन्नुभयो, ‘पानी शुद्धीकरणका लागि फिल्टरलगायत उपकरण जडान गरिएको छ ।’ निर्माण शुरु भएको सात वर्षपछि धारामा पानी आउँदा स्थानीयमा खुशी छाएको छ । 

योजना सम्पन्न भई सञ्चालनमा आएसँगै हीरापाटा, न्यौपाने थर, जामुने, देउराली, लौके, बगैँचा, मान्केस्वाँरा, भैरवथानका १ सय ५० घरका सात सय ९५ जना प्रत्यक्ष लाभान्वित भएका छन् ।