काठमाडौँ । प्रधानसेनापति अशोकराज सिग्देलले विगतको द्वन्द्वका घाइते अवकाश प्राप्त सैनिकलाई सम्मान गर्नुभएको छ ।

सैनिक मुख्यालय जङ्गीअड्डामा आयोजित कार्यक्रममा उहाँले एकजना घाइतेलाई चारपाङ्ग्रे स्कुटर तथा अन्य ३४ जनालाई जनही १ लाख ४० हजार रुपैयाँका दरले आर्थिक सहायता प्रदान गर्नुभएको सैनिक जनसम्पर्क तथा सूचना निर्देशनालयले जनाएको छ ।

त्यस अवसरमा प्रधानसेनापति सिग्देलले गत चैतमा डोल्पाको ठूलीभेरी नगरपालिका–४ स्थित तिप्लामष्ट भवानी सामुदायिक वनमा लागेको आगो नियन्त्रणका क्रममा वीरगति प्राप्त जमदार केशव जार्गा मगर, सिपाहीद्वय हेमन्त रावत र आशिक बुढाको परिवारलाई जनही १ लाख ४० हजार रुपैयाँका दरले आर्थिक सहयोग प्रदान गर्नुभयो ।

कार्यक्रममा गिनिज वल्र्ड रेकर्डमा विभिन्न ५ विधामा विश्व कीर्तिमान राखी नेपाल र नेपाली सेनाको गरिमा उच्च राख्न सफल प्युठ हरिचन्द्र गिरीलाई १ लाख ५० हजार रुपैयाँ पुरस्कारसहित सम्मान गरियो ।

त्यस अवसरमा विजेश्वरी ज्ञान मन्दिर सैनिक महाविद्यालयकी छात्रा आइष्मा आचार्यलाई ५१ हजार रुपैयाँसहित प्रशंसापत्र प्रदान गरियो । 

छात्रा आचार्यले विसं २०८० को विद्यालय शिक्षा (एसइई) परीक्षामा उत्कृष्ट नतिजा र राष्ट्रियस्तरको खेलकुद (एथलेटिक्स विधा) मा विभिन्न समयमा दुई स्वर्ण, एक रजत र एक कास्य पदक प्राप्त गर्नुभएको थियो ।