पोखरा । मुक्तक मञ्च पोखरामा स्थापित ‘राष्ट्रिय मुक्तक पुरस्कार–२०८०’ साहित्यकार उषा शेरचनलाई प्रदान गरिएको छ । 

३३ हजार ३ सय ३३ राशिको  पुरस्कार शनिबार आयोजित समारोहमा कलाकार दुर्गा बराल ‘वात्सायन’, साहित्यकार सरुभक्तलगायतले संयुक्त रूपमा शेरचनलाई प्रदान गर्नुभयो । पोखरेली साहित्यकार अल्पबिरामले स्थापना गर्नुभएको पुरस्कार छैटौँपटकमा साहित्यकार शेरचनलाई प्रदान गरिएको हो ।

मुक्तक विधाको उन्नयनमा सिर्जनात्मक योगदान पुर्याए बापत उहाँलाई पुरस्कृत गरिएको मञ्चका अध्यक्ष रामजीप्रसाद आचार्यले जानकारी दिनुभएको छ । शेरचनका मुक्तकसहित, कविता, गीत, कथा, उपन्यासलगायतका विधामा कृति र फुटकर रचना प्रकाशित छन् । 

मञ्चले यसअघि उक्त पुरस्कार साहित्यकार सरुभक्त, चेतन कार्की, तेजनाथ घिमिरे, रत्नशम्शेर थापालगायतलाई प्रदान गरिसकेको छ ।  २०६८ सालदेखि हरेक दुई वर्षको अन्तरमा पुरस्कार प्रदान गर्ने गरिएको अध्यक्ष आचार्यले बताउनुभयो । मुक्तकको उत्थानमा मञ्च क्रियाशील रहँदै आएको छ ।