बिराटनगर । कोशीका तत्कालीन आन्तरिक मामिला तथा कानुनमन्त्री लीलाबल्लभ अधिकारीको नेतृत्वमा जापान जाने युवाहरूले १० देखि १३ लाखसम्म रकम बुझाएको खुलासा भएको छ । 

दुई जनालाई आन्तरिक मामिला तथा कानुन मन्त्रालयकै कर्मचारी र एक जनालाई वडा सदस्यका रूपमा जापान उडाइएको प्रहरी अनुसन्धानमा खुलेको हो । यसका लागि बनाइएको नक्कली परिचयपत्रमा मन्त्री अधिकारीले नै  ‘निमित्त कार्यालय प्रमुख’ का रुपमा हस्ताक्षर गर्नुभएको रहस्य खुलेको छ । 

तत्कालीन मन्त्री अधिकारीसँगै गएका कञ्चन देवकोटा, दावा शेर्पा र जनक राईको कागजात शंकास्पद देखिएपछि चारै जनालाई जापानको अध्यागमनले टोकियो विमानस्थलबाटै फिर्ता गरिदिएको थियो । चारैजना फर्केर शनिबार त्रिभुवन अन्तर्राष्ट्रिय विमानस्थल आइपुगे पछि अध्यागमनले अधिकारीलाई कागज गराएर छाडेको थियो भने अन्य तीन जनालाई प्रहरीको जिम्मा लगाएको थियो ।


प्रहरी नियन्त्रणमा रहेका रसुवाको कालिका गाउँपालिका–५ का २२ वर्षीय देवकोटा, खोटाङको ऐंसेलुखर्क गाउँपालिका–२ का ३६ वर्षीय शेर्पा र खोटाङकै केपिलासगढी गाउँपालिका–४ का राईसँग प्रहरीले सोधपुछ गर्दा मानव तस्करीको खुलासा भएको हो । यसैका आधारमा प्रहरीको काठमाडौँ उपत्यका अपराध अनुसन्धान कार्यालयले नुवाकोटको बिदुरका २२ वर्षीय जुगल रिजाल, दोलखाको जिरीका ३० वर्षीय वीरबहादुर सुनुवार र धादिङको त्रिपुरासुन्दरीका ३४ वर्षीय महेश पाण्डेलाई काठमाडौँबाट पक्राउ गरेको हो । त्यसपछि उनीहरूमाथि थप अनुसन्धान गर्न उपत्यका प्रहरी अनुसन्धान कार्यालयले जिल्ला प्रहरी परिसर काठमाडौँलाई जिम्मा लगाएको छ ।

अनुसन्धानमा संलग्न प्रहरी अधिकारीका अनुसार शेर्पासँग ऐंसेलुखर्क गाउँपालिकाको वडा नं २ को सदस्य र देवकोटा तथा राईसँग कोशी प्रदेशको आन्तरिक मामिला तथा कानुन मन्त्रालयको कर्मचारीको नक्कली परिचयपत्र थियो । अधिकारीले भने आफूसँग जापान पुगेका तीनै जनासँग भएको परिचयपत्रमा आफ्नै हस्ताक्षर देखिएको तर त्यसबारे आफू जानकार नभएको दाबी गर्नुभएको छ । नक्कली परिचयपत्रमा अंग्रेजीमा हस्ताक्षर गरिएको छ । ‘मैले अहिलेसम्म अंग्रेजीबाट हस्ताक्षर गरेको छैन, त्यो हस्ताक्षर मेरो पनि होइन,’ अधिकारीले भन्नुभयो, ‘नक्कली परिचयपत्र बनाएर मेरो हस्ताक्षर किर्ते गरिएको हो ।’

प्रहरीका अनुसार परिचयपत्र बागबजारमा बनाइएको खुलेको छ । ‘अनुसन्धानका क्रममा पक्राउ परेका महेश पाण्डेले नै यो तथ्य खुलाएका हुन्, नक्कली परिचयपत्र बनाउने कार्यमा संलग्न अरू दुई फरार छन्,’ प्रहरी स्रोतले भन्यो । 

अधिकारीसँग गएका तीनै जनाले प्रहरीसँगको बयानमा महेश पाण्डेलाई १० देखि १३ लाख रुपैयाँसम्म बुझाएको खुलाएका छन् । उक्त रकम पाण्डेमार्फत अरू व्यक्तिले बाँडेर लगेको पनि अनुसन्धानबाट खुलेको छ । ‘मन्त्रीसँग रहेका तीनै जनाले पाण्डेलाई रकम बुझाएका रहेछन्, प्रारम्भिक अनुसन्धानका क्रममा यो पुष्टि भइसकेको छ,’ ती प्रहरी अधिकारीले भने, ‘मन्त्रीसँग जापान गएको टोलीलाई उतै राख्ने र मन्त्री मात्रै फर्किने योजना रहेको स्पष्ट देखिन्छ ।’