काठमाडौँ ।  राष्ट्रपति रामचन्द्र पौडेलले नेपाली इतिहास, साहित्य र शिक्षा क्षेत्रमा इतिहासकार ज्ञानमणि नेपालले पुर्याउनुभएको योगदान नेपाल र नेपालीका लागि सदैव स्मरणीय रहने बताउनुभएको छ । 

इतिहासकार नेपालको निधनको खबरले आफूलाई दुःखी बनाएको राष्ट्रपतिले आज पठाउनुभएको समवेदना सन्देशमा उल्लेख छ । ‘तथ्य र प्रमाणको कसीमा रहेर नेपालको राजनीति, साहित्य लगायतको इतिहास लेखनमा जीवन समर्पित गर्नुभएका विद्वान इतिहासकार ज्ञानमणि संस्कृत वाङ्मय, शिलालेख तथा ऐतिहासिक दस्तावेजलाई समेटेर इतिहास लेखनमा दख्खल राख्नुहुन्थ्यो’ समवेदना सन्देशमा भनिएको छ । 

इतिहासकार नेपालका ‘नेपालको महाभारत’ तथा ‘नेपाल निरुक्त’ लगायतका  कृति एवं कैयौँ अनुसन्धान तथा खोजमूलक लेखरचना चिरकालसम्म ज्ञानका भण्डारकारुपमा रहिरहने राष्ट्रपतिले समवेदना सन्देशमा उल्लेख गर्नुभएको छ । राष्ट्रपतिले इतिहासकार नेपालका परिवारजनमा गहिरो समवेदना प्रकट गर्नुभएको छ ।