काठमाडौँ ।  प्रमुख प्रतिपक्षी नेपाली कांग्रेसका नेता कृष्णप्रसाद सिटौलाले उपप्रधानमन्त्री एवं गृहमन्त्री रवि लामिछाने समेत जोडिएको सहकारीको रकम अनियमितताका सम्बन्धमा संसदीय छानविन समिति गठन गर्न माग गर्नुभएको छ ।

राष्ट्रियसभाको आजको बैठकमा दलका तर्फबाट धारणा राख्दै नेता सिटौलाले उक्त समिति गठन नभए सदनका बैठक सञ्चालनमा सहजता नआउने स्पष्ट गर्नुभयो । ‘संसदमा पटक–पटक संसदीय छानविन समिति गठन गरौँ भनेर कुरा उठाउदै आएका छौँ’ उहाँले भन्नुभयो– ‘जहाँनिर शक्ति छ त्यहाँ छानविन बन्द छ । गृहमन्त्रीको राजीनामा मागिएको छैन । कुरा उठेपछि वास्तविकता थाहा हुनुपर्छ ।’

उहाँले आफ्नो पार्टीको संसदीय दलको निर्णय पनि गृहमन्त्रीमाथिको छानविन समिति बनाउनुपर्छ भन्ने रहेको बताउँदै समिति गठन नभए संसद् बैठक अघि बढ्न नसक्ने बताउनुभयो । ‘सरकारले छिट्टै सहमतिका आधारमा छानविन समिति बनाउँछ भन्नेमा हामीलाई विश्वास छ उहाँले भन्नुभयो ।