काठमाडौँ ।  उपराष्ट्रपति रामसहायप्रसाद यादवसँग पाकिस्तानका राजदूत अबरार एच हाशमीले शिष्टाचार भेटवार्ता गर्नुभएको छ । 

राजदूत हाशमीले शुक्रबार लैनचौरस्थित उकार्यालयमा शिष्टाचार भेटवार्ता गर्नुभएको उपराष्ट्रपति कार्यालयले जनाएको छ । उपराष्ट्रपतिको सचिवालयका अनुसार उहाँहरुबीचको भेटवार्तामा  बधाई तथा शुभकामना आदानप्रदान हुनुका साथै द्विपक्षीय सम्बन्ध, व्यापार तथा आर्थिक, शैक्षिक तथा सांस्कृतिक र क्षेत्रीय तथा अन्तर्राष्ट्रिय सहयोगका विषयमा छलफल भएको छ । 

त्यस अवसरमा उपराष्ट्रपति यादवले नेपाल र पाकिस्तानबीच सन् १९६० मार्च २० मा कूटनीतिक सम्बन्ध स्थापना भएयता निकट र सुमधुर सम्बन्ध रहेको बताउनुभएको थियो ।  उपराष्ट्रपति यादवले नेपाल र पाकिस्तानले व्यापार र आर्थिक क्षेत्रमा सहयोग विस्तार गर्नु पर्नेमा जोड दिनुभयो । उहाँले जलविद्युत्, पर्यटन, पूर्वाधार, विज्ञान प्रविधि लगायतका क्षेत्रमा लगानी गर्न पाकिस्तानका लगानीकर्तालाई आग्रह गर्नुभएको छ ।

राजदूत हाशमीले नेपाल र पाकिस्तानबीचको सम्बद्ध प्रगाढ रहेको उल्लेख गर्दै यसलाई अझ उचाईमा पुर्याउनुपर्नेमा जोड दिनुभयो । उहाँले नेपाल र पाकिस्तानबीच अबरुद्ध हवाई सेवा पुनः सञ्चालनको आवश्यकता औल्याउनुभयो ।