काठमाडौँ । प्रतिनिधिसभा बैठक प्रमुख प्रतिप्रक्षी दल नेपाली कांग्रेसको अवरोधपछि  स्थगित भएको छ । कांग्रेसले सहकारीको रकम अपचन गर्नेका विरुद्ध निष्पक्ष छानविनका लागि संसदीय समिति गठन हुनुपर्ने माग गर्दै अवरुद्ध गरेपछि बैठक स्थगित भएको हो ।

बैठकको शुरुमै कांग्रेस र राष्ट्रिय स्वतन्त्र पार्टीका सांसदहरु आसनबाट उभिएपछि सभामुख देवराज घिमिरेले कांग्रेस सचेतक सुशीला थिङलाई बोल्न समय दिनुभएको थियो । उहाँले सडकमा सहकारीपीडित आन्दोलनरत रहेको उल्लेख गर्नुभयो ।

सचतेक थिङले सूर्यदर्शनलगायत ६ वटा सहकारीबाट  एक अर्बभ रुपैयँँ न्दा बढी रकम गोर्खा मिडिया कम्पनीमा गैरकानुनी रुपमा लगानी गर्ने तत्कालीन सञ्चालक र प्रबन्ध निर्देशक रवि लामिछानेलाई दण्ड हुन्छ कि हुदैन भनी सरकारसँग प्रश्न गर्नुभयो । साथै उहाँले त्यस सम्बन्धमा आजै बसेको कांग्रेस संसदीय दलले सहकारीको रकम अपचन गर्नेविरुद्ध छानविनका लागि संसदीय समिति गठन गर्ने निर्णय गरेको जानकारी गराउनुभएको थियो ।

त्यसपछि सभामुख देवराज घिमिरेले रास्वपाका सांसद मनिष झालाई बोल्न समय दिनुभएको थियो । उहाँले बोल्ने क्रममा कांग्रेस सांसदहरु आसनबाट उभिईरहे पछि सभामुखले आसनमा बस्न र सदन सञ्चालन  गर्नका लागि सहयोग गर्न आग्रह गर्नुभएको थियो । त्यसपछि सत्ता पक्षका सांसदहरु पनि आसनबाट उभिएपछि सभामुखले सदन सञ्चालन गर्नका लागि बस्न पटक–पटक आग्रह गर्नुभएको थियो ।

कांग्रेस सांसदहरु आसनबाट उभिइरहेपछि सभामुखले बैठक स्थगित भएको घोषणा गर्नुभएको हो।