काठमाडौँ । आइसीसी क्रिकेट लिग-२ अन्तर्गत त्रिकोणात्मक श्रृंखलाको आजको खेलमा नामिबियाले नेदरल्यान्ड्सलाई २४ रनले पराजित गरेको छ ।

त्रिवि क्रिकेट मैदानमा मैदान भिजेर ढिलोगरी खेल शुरु भएका कारण ४५ ओभरमा घटाइएको खेलमा नेदरल्यान्ड्सले जितको लागि २ सय ४ रनको विजयी लक्ष्य पछ्याएको ४३.५ ओभरमा १ सय ७९ रनमा अलआउट भएको थियो ।

नेदरल्यान्ड्सका नोआ क्रोस ४६ रनमा अविजित रहेपनि तल्लोक्रममा साथ नपाउँदा जितसम्म पुर्याउन सकेनन् । उनले ५६ बलमा ३ चौका प्रहार गरेका थिए । ओपनर म्याक्स ओ डाउडले ४१ रन जोडेका थिए ।

नामिबियाका लागि कप्तान एरास्मस र जान फ्रिलिंकले ३-३ विकेट लिँदा बर्नार्ड स्कोल्जले २ विकेट हात पारे । रुबेन ट्रम्प्लम्यान र निकोल लफ्टि इटनले १-१ विकेट लिए ।

यो जितसँगै नामिबिया ४ खेलमा ६ अंक जोड्दै लिग २ को शीर्षस्थानमा उक्लेको छ । नेपाल र नेदरल्यान्ड्सको ३ खेलमा २ २ अंक छ । अब अन्तिम खेल आइतबार नेपाल र नेदरल्यान्ड्सबीच हुँदैछ ।