ललितपुर । नेपाली कांग्रेसको महासमिति बैठक शुरु भएको छ । ललितपुरको गोदावरीस्थित सम्मेलन केन्द्रमा पार्टी सभापति शेरबहादुर देउवाले दीप प्रज्वलन गरी महासमिति बैठकको उदघाटन गर्नुभयो । महासमिति बैठक फागुन १० गतेसम्म संचालन हुनेछ । 

महासमिति बैठकमा नीति, सांगठनिक, समसामयिक, वर्तमान आर्थिक अवस्था र लेखा गरी पाँच प्रतिवेदन पेस हुनेछन् । नीति प्रतिवेदन उपसभापति पूर्णबहादुर खड्काले, सांगठनिक प्रतिवेदन महामन्त्री गगन थापाले र समसामयिक राजनीतिक प्रतिवेदन अर्का महामन्त्री विश्वप्रकाश शर्माले प्रस्तुत गर्ने कार्यतालिका छ । 

यसैगरी अर्थमन्त्रीसमेत रहनुभएका पार्टी प्रवक्ता डा. प्रकाशशरण महतले नेपालको वर्तमान आर्थिक अवस्था, सम्भावना र भावी दिशा समेटिएको प्रतिवेदन र लेखा समितिका संयोजक श्याम घिमिरेले लेखा परीक्षण प्रतिवेदन प्रस्तुत गर्ने कार्यतालिका रहेको छ । 

नीति अधिवेशनका रुपमा रहेको महासमिति बैठकमा देशभरीबाट दुई हजार भन्दा बढी प्रतिनिधिे सहभागी छन् ।