कैलाली । पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले प्रधानमन्त्री पुष्पकमल दाहाल नसच्चिने बताउनुभएको छ । 

अध्यक्ष ओलीले आइतबार नेकपा एमाले कैलालीको नवौ अधिवेशन उद्घाटन गर्दै गठबन्धन सरकारले दमुलुकमा एउटा पनि गतिलो काम नरेको बताउनुभयो । ‘एउटा पनि देखाउन लायक काम प्रधानमन्त्रीले गर्नुभएको छैन’ उहाँले भन्नुभयो – ‘एक वर्ष पुग्दा भाषण गर्दा पनि हामी काम गर्छौं, सच्चिन्छौं भन्नुहुन्छ । ७० वर्ष पुग्न लाग्नुभयो, अहिलेसम्म नसच्चिएको कहिले सुध्रिने हो ?’

एमाले अध्यक्ष ओलीले वर्तमान सरकारलाई निकम्माको संज्ञा दिनुभयो ।  ‘यो निकम्मा सरकार हो, यसले केही काम पनि गर्न सक्दैन’ उहाँले भन्नुभयो – ‘हामीले ३ ुसय ९६ वटा अस्पताल हरेक पालिकामा हुनुपर्छ भनेका थियौं । कहाँ गए ती अस्पताल ?’

ओलीले मुलुक गम्भीरमा पर्न लागेको उल्लेख गर्नुभयो । ‘अहिले मुलुक गम्भीर मोडमा रहेको छ,  ‘राष्ट्रियता कमजोर भएको छ’ उहाँले भन्नुभयो – १स्वाधीनता र स्वतन्त्रता कमजोर भएका छन् । तिनको संरक्षण गर्न सकिएको छैन । देशमा सुशासन छैन ।’

सरकारले गलत काममा संलग्नहरूलाई पनि कारबाही गर्न नसकेको ओलीको भनाई छ ।  ‘यो गरिबलाई हेप्ने, न्याय नदिने बलियाका पक्षको सरकार हो, क्विन्टलको क्विन्टल सुन आएको देख्दा पनि यो सरकारले कारबाही गर्न सक्दैन’ उहाँले भन्नुभयो– ‘ सरकार निरीह छ । ‘तस्कर हेर्दा आफ्नै मान्छे भेट्छ, कारबाही गर्न सक्दैन ।’

एमाले अध्यक्ष विदेश जाने युवालाई रोक्न नसक्नु विडम्बना रहेको धारणा व्यक्त गर्नुभयो । ‘३,४ हजार हरेक दिन विदेश गइरहेका छन् । गाउँबस्तीहरु रित्ता भइरहेका छन् । सरकार हेरिरहेको छ’ उहाँले भन्नुभयो – ‘म प्रधानमन्त्री भएको बेला १८ प्रतिशतले बाहिर जानेहरूको संख्या बढेको थियो, उत्पादन वृद्धि भएको थियो । पूर्वाधारको विकास भएको थियो । एकै दिनमा २१० वटा पालिका सदरमुकाम जोड्ने सडक शिलान्यास गरेको थियो । आज ती सडकहरु अलपत्र छन् । ती आयोजना कहाँ गए ? ‘हामीलाई यो देशमा सुशासन ल्याउनु छ, रोजगारीको अवसर सृजना गर्नु छ, जनताको जीवनमा परिवर्तन ल्याउनु छ ।’

ओलीले कैलाली एमालेको नेतृत्वमा सक्षम र योग्य चुन्न सुझाव दिनुभएको छ ।‘सर्वसम्मतिले होस् या लोकतान्त्रिक विधिबाट होस्, यस नेतृत्वले सबै साथीहरूलाई मिलाएर एकताबद्ध बनाएर सिङ्गो नेकपा एमाले उदाहरणीय रूपले अगाडि बढ्नेछ’ उहाँले भन्नुभयो – ‘अनुशासनहीन गुटबन्दी र अराजकता जस्ता कुराहरू सङ्गठनको लागि हानिकारक हुन् ।’