काठमाडौँ । सरकारको नेतृत्व गरिरहेको नेकपा माओवादी केन्द्रको नाम र चुनाव चिन्ह फेर्न सुझाव आएको छ। मंगलबारदेखि राजधानीमा भइरहेको विधान अधिवेशनमा केही नेताहरुबाट यस्तो सुझाव आएको हो । 

अधिवेशनको समूहगत छलफलमा बागमती प्रदेश अध्यक्ष सरल सहयात्रीले प्रस्तावनालाई छरितो बनाउनुपर्ने, पार्टी र निर्वाचन चिह्न फेर्न सुझाव आएको जानकारी दिनुभएको छ । सहयात्रीका अनुसार छलफलमा सङ्गठनात्मक सिद्धान्तलाई छोटो बनाउनुपर्ने र पार्टी सदस्य दिँदा सरल बनाउनुपर्नेमा जोड दिइएको छ ।  उहाँले निर्वाचन, लेखा र अनुशासनलाई थप अधिकार दिनुपर्ने र महाधिवेशनको मिति स्पष्टरुपमा तोकिनुपर्ने सुझाव रहेको उल्लेख गर्नुभयो । 
 
अर्का नेता ओम शर्माले पनि प्रस्तावनालाई चुस्त बनाउनुपर्ने र पार्टीको नाम फेर्नुपर्ने सुझाव आएको बताउनुभयो । विधान अधिवेशनमा सहभागीलाई विभिन्न २० समूहमा विभाजन गरिएको छ । अहिलेसम्म १३ समूहले विधानमाथि सुझाव पेश गरिसकेका छन् ।