काठमाडौँ । नेकपा एमालेले संसदमा सशक्त प्रतिपक्षको भूमिका निर्वाह गर्ने तयारी  गरेको छ । 

प्रमुख प्रतिपक्ष दल एमालेले सङ्घीय संसद्को हिउँदे अधिवेशनमा अनिवार्य उपस्थित भएर प्रभावकारी भूमिका निर्वाह गर्न आफ्ना सांसदहरुलाई  निर्देशन समेत दिएको छ ।  सङ्घीय संसद्को हिउँदे अधिवेशन आज दिउँसो ४ बजेदेखि शुरु हुँदैछ । एमाले सचेतक महेश बर्तौलाले आइतबार सम्पन्न संसदीय दल बैठकको  निर्णय भएअनुसार निर्देशन दिइएको जानकारी दिनुभयो । उहाँले चालु अधिवेधनका बैठकहरुमा विगतमा भन्दा अझ सशक्त र प्रभावकारीरुपमा प्रतिपक्षको भूमिका निर्वाह गरिने बताउनुभयो ।
 
दलको बैठकले संसद्को अधिवेशनमा संविधान कार्यान्वयनका लागि आवश्यक कानुन निर्माण, सामाजिक न्याय, सुशासन, समृद्धि र राष्ट्रिय हितमा प्रभावकारी भूमिका खेल्न पनि निर्देशन दिएको छ ।  बैठकले युवा पलायन रोक्न र पश्चिम एसियामा बिग्रँदो शान्ति सुरक्षाको अवस्थालाई ध्यान दिई अप्ठ्यारोमा रहेका नेपाली युवालाई अविलम्ब स्वदेश फर्काउन सरकारलाई आग्रह गरेको छ ।