पर्वत । मगर समुदायको संस्कृति, परम्परा र भेषभूषाको संरक्षणका लागि सङ्ग्राहलय निर्माण गर्ने उद्देश्यले पर्वतमा राष्ट्रिय मगर महोत्सव आयोजना गरिने भएको छ । 

फागुन १५ गतेदेखि २६ गतेसम्म मगर महोत्सव आयोजना गरिने भएको हो । पर्वतमा सामाजिक गतिविधिमा सक्रिय मगर समुदायको साझा संस्था पुन युवा क्लबले ४२औँ मगर दिवसका अवसरमा तेस्रोपटक मगर महोत्सव गर्न लागिएको हो । 

‘कला संस्कृतिको सम्वद्र्धनमा ऐक्यबद्धता, खेल, व्यापार, कृषि तथा पर्यटन प्रवद्र्धनमा मुख्य प्रतिबद्धता’ भन्ने मूल नाराका साथ सञ्चालन गर्न लागिएको महोत्सवमा अन्तरपालिका भलिबल प्रतियोगिता आयोजना गरिने छ । प्रतियोगितामा प्रथम हुनेले २ लाख २ हजार २ सय २२ रुपैयाँ , द्वितीय हुनेले  १लाख १ हजार १ सय ११ रुपैयाँ र तृतीय हुनेले  ५० हजार १ सय ११ रुपैयाँँ प्राप्त गर्नेछन् । 

त्यसैगरी पालिकास्तरीय महिला भविबल, प्रौढ भलिबल, पुख्र्यौली नाच, रत्यौली र लोकभजनलगायतका प्रतियोगिता पनि आयोजना गरिनेछ । महोत्सवमा मगर समुदायको पहिचानका रुपमा रहेका सोरठी, सालैजो, यानिमाया, सुनिमाया लगायतको प्रस्तुति पनि रहनेछ । 

महोत्सव आयोजनाका लागि विभिन्न १८ उपसमिति गठन गरिएको छ  । मूल संयोजक कृष्ण पुनले जानकारी दिनुभयो ।  महोत्सवमा विश्वकै दोस्रो अग्लो बञ्जी, जीपलाइन, केवुलकार, झोलुङ्गे पुलको अवलोकन, हरेक दिन ख्यातिप्राप्त राष्ट्रिय कलाकाको प्रस्तुतिसमेत रहने आयोजकले जनाएको छ । 

महोत्सवमा दुई सयभन्दा बढी व्यावसायिक प्रदर्शनी कक्ष रहने मूल संयोजक पुनले जानकारी दिनुभयो । उहाँका अनुसार महोत्सबवाट ७२ लाख रुपैयााँ आम्दानी हुने अपेक्षा गरिएको छ ।  ५३ लाख रुपैयाँ खर्च हुने अनुमान छ । महोत्सवबाट बचत हुने रकम नुमना मगर सङ्ग्रहालय निर्माणमा खर्च गरिनेछ । 

सङ्ग्रहालय निर्माणका लागि शिलान्यासपछि केही काम भए पनि बजेट अभावले काम सम्पन्न हुन नसकेको नेपाल मगर सङ्घका केन्द्रीय सदस्य सोम पुनले जानकारी दिनुभयो । यो क्लबले यसअघि देउसीभैलोमार्फत सङ्कलित रकम  एम्बुलेन्स सेवा सञ्चालनका लागि खर्चिएको थियो । 

यो खबर पढेर तपाईलाई कस्तो महसुस भयो ?

0 %

0 %

0 %

0 %

0 %

0 %