सिन्धुपाल्चोक । काठमाडौँ उपत्यकामा मेलम्चीको पानी नियमित रुपमा उपलब्ध गराउनको लागि सरकारलाई दबाब दिन राष्ट्रिय स्वतन्त्र पार्टी (रास्वपा) ले आजदेखि ‘ अभियान’ शुरु गर्ने भएको छ ।  

रास्वपाले योसँगै मुखुकको विभिन्न ठाउँमा त्यहाँका समस्या उठाएर राष्ट्रव्यापी दबाब कार्यक्रम संचालन गर्ने भएको छ । चैत २१ सम्म जारी रहने पहिलो चरणको अभियानको पार्टी सभापति रवि लामिछानेले मेलम्चीबाट अभियानको शुभारम्भ गर्नुहुने जनाइएको छ ।
 
‘राष्ट्रव्यापी दबाब अभियान’ को शुरुवात मेलम्ची खानेपानी आयोजना स्थलबाट शुरु गर्न लागिएको रास्वपा सिन्धुपाल्चोकका संयोजक माया गुरुङले बताउनुभयो । उहाँले मेलम्ची खानेपानी आयोजना निर्माणलाई पूर्णता दिन दबाबका लागि आयोजनाको कार्यालय परिसरबाटै अभियानको थालनी गर्न लागेको जानकारी दिनुभएको छ। 

सिन्धुपाल्चोक–काठमाडौँ दबाब यात्राको सांसद सोविता गौतमले अगुवाइ गर्नुहुनेछ । मेलम्चीस्थित खानेपानी कार्यालय, पिपलबोटबाट पदयात्रा शुरु गरी हेलम्बुस्थित अम्बाथान मुहानसम्म पुग्ने कार्यक्रम तय भएको जनाइएको छ । पदयात्राका क्रममा  स्थानीय बस्तीका बासिन्दाको सुझाव तथा गुनासा समेत लिइने बताइएको छ ।
 
दबाब यात्रामा  सांसदसहित २१ जनाले अगुवाइ गर्नेछन् । अभियानअन्तर्गत पहिलो चरणमा प्रत्येक प्रदेशबाट तीन–तीनवटा योजना छनोट गरी २१ योजना निर्माणका लागि दबाब दिइने रास्वपाले जनाएको छ । रुग्ण र अलपत्र पारिएका विकास योजनाको कामप्रति सरकारको ध्यानाकर्षण गराउनका लागि रास्वपाले दबाब अभियान शुरु गर्न लागिएको सांसद गौतमले बताउनुभयो ।