काठमाडौँ । पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले आफू नेतृत्वको सरकारले छिमेकी मुलुक भारत र चीनसँग सन्तुलित सम्बन्ध राखेको दाबी गर्नुभएको छ । 

पूर्वप्रधानमन्त्री दाहालले मंगलबार हुलाकी लोकमार्ग केन्द्रित जनतासँग माओवादी–तराई मधेश जागरण अभियान अन्तर्गत नवलपुर कावासोतीमा आयोजित खबरदारी सभामा यस्तो दाबी गर्नुभएको हो । 

आफूले भारत र चीनसँग राम्रो र सन्तुलित सम्बन्ध विस्तार गरेको भन्दै केही ऐतिहासिक निर्णय समेत गरेको दाहालको भनाई छ । ‘मेरो कार्यकालमा छिमेकी हिन्दुस्तान र चाइनासँग राम्रो सन्तुलित सम्बन्ध विस्तार भयो, थुप्रै महत्त्वपूर्ण र ऐतिहासिक निर्णय पनि भए’ सभामा उहाँले भन्नुभयो– ‘अन्तर्राष्ट्रिय क्षेत्रमा चाहे त्यो संयुक्त राष्ट्रसंघको कुरा गरौं, चाहे जलवायु परिवर्तनको कुरा गरौं, चाहे अन्तर्राष्ट्रिय सम्मेलनको कुरा गरौं हामीले नेपाल र नेपालीको पक्षमा र त्यतिबेला नेपाल ४७ देशको अध्यक्षको भूमिकामा थियो । मैले ४७ देशको अध्यक्षको नाताले पनि सबै गरिब देशको समस्यालाई राष्ट्रसंघमा राख्ने र नेपाली जनताको इज्जत र प्रतिष्ठालाई उठाउने काम भएको थियो ।’

राम्रो काम गर्दागर्दै बिचौलियाले आफू नेतृत्वको सरकार ढालेको दाहालको दुखेसो छ । ‘यसरी भ्रष्टाचार विरोधी अभियान, सामाजिक न्यायको अभियान र आर्थिक विकासको अभियान चलाउँदै गर्दा भ्रष्टाचारी, बिचौलिया र दलालहरूबाट बाहिर जान बाध्य पारियो’ उहाँले भन्नुभयो– ‘तपाईं, हामी एकजुट भएर अघि बढ्यौँ भने भ्रष्टाचारीलाई यो देशबाट निर्मुल गर्न सकिन्छ ।