काठमाडौँ । नेपाल पत्रकार महासंघको ६९ वर्षको इतिहासमा पहिलो पटक महिला नेतृत्व निर्वाचित भएको छ । शुक्रबार भएको महासंघको निर्वाचनबाट निर्मला शर्मा अध्यक्ष निर्वाचित हुनुभएको हो । यद्यपि यसको औपचारिक घोषणा आज दिउँसोमात्र हुने छ ।

उहाँले निकटम प्रतिद्वन्द्वी रमेश विष्टलाई पराजित गर्दै महासंघको नेतृत्व गर्ने निश्चित भएको हो । अध्यक्षमा देवीप्रसाद सापकोटा र लालसिंह लामा पनि उम्मेदवार हुनुहुन्थ्यो । 

पदाधिकारीमा वरिष्ठ उपाध्यक्षमा दीपक आचार्य, उपाध्यक्षमा नितु पण्डित, महासचिवमा रामप्रसाद दाहाल निर्वाचित हुने निश्चित भएको छ । कोषाध्यक्षमा रामकृष्ण अधिकारी जित नजिक हुनुहुन्छ । 

शर्मा सत्तारुढ एमाले निकट प्रेस चौतारी र कांग्रेस निकट प्रेस युनियनको संयुक्त प्यानलबाट उम्मेदवार हुनुभएको थियो । पराजित भएका विष्ट प्रेस युनियनकै बागी हुनुहुन्छ । उहाँलाई प्रेस सेन्टरसहित ५ संगठनको समर्थन थियो ।

महासंघ हाँक्न लाग्नुभएकी शर्मा २०७७ सालमा भएको निर्वाचनमा पनि अध्यक्षको उम्मेदवार हुनुहुन्थ्यो । त्यतिबेला प्रेस चौतारीबाट एकल प्रतिस्पर्धामा उहाँ विपुल पोखरेलँग पराजित हुनुभएको थियो । पराजित भएको करिब साढे ३ वर्षपछि उहाँले इतिहासमै महासंघको पहिलो महिला अध्यक्ष हुने अवसर पाउनुभएको छ । 


केन्द्रीय निर्वाचन समितिका संयोजक प्राध्यापक चिरञ्जीवी खनालका अनुसार जिल्ला र प्रदेशले पठाएका विवरण रुजु गरेर चुनावी नतिजा सार्वजनिक गर्ने तयारी भइरहेको छ ।