काठमाडौँ । सरकारी कागजात कीर्ते र मानव तस्करी आरोपमा आज पक्राउ परेका कोशी प्रदेशका निवर्तमान मन्त्री लिलाबल्लभ अधिकारीलाई प्रहरी हिरासतमै राखेर अनुसन्धान गरिने भएको छ । 

काठमाडौँ जिल्ला अदालतले अधिकारीलाई २ दिन हिरासतमा राख्न प्रहरीलाई अनुमति दिएको छ । सरकारी कागजात कीर्ते र मानव तस्करीको आरोपमा अनुसन्धान गर्न हिरासतमा राख्नुपर्ने भन्दै प्रहरीले अधिकारीलाई आज काठमाडौँ ल्याए लगत्तै जिल्ला अदालत पेश गरेको थियो । 

प्रहरीले अधिकारीलाई आइतबार नै मोरङको विराटनगरबाट पक्राउ गरी काठमाडौं ल्याएको हो। अधिकारी एउटा कार्यक्रममा भाग लिन जापान गएका बेला ३ जना अपरिचित व्यक्ति पनि उनीसँगै गएका थिए । उनीहरुलाई पैसा लिएर जापान लगेको खुलेपछि अधिकारीमाथि मानव तस्करीको आरोप लागेको हो । 

अधिकारीसँगै जापान गएका ३ जनालाई प्रहरीले यसअघि नै पक्राउ गरिसकेको छ । उनीहरुलाई नेपाल फर्किँदा त्रिभुवन विमानस्थलबाट पक्राउ गरिएको हो ।