कास्की । सहकारी ठगी प्रकरणमा पक्राउ परेका पूर्वगृहमन्त्री तथा राष्ट्रिय स्वतन्त्र पार्टीका सभापति रवि लामिछानेलाई थप १३ दिन प्रहरी हिरासतमा राखिने भएको छ । 

पूर्वउपप्रधनमन्त्री तथा गृहमन्त्री लामिछानेलाई कास्की जिल्ला अदालतले थप १३ दिन हिरासतमा राखेर अनुन्धान गर्न प्रहरीलाई अनुमति दिएको छ ।  न्यायाधीश नवराज दाहालको इजलासले लामिछानेलाई  हिरासतमै राखेर अनुसन्धान गर्न  अनुमति दिएको हो । 
 
पूर्वउपप्रधनमन्त्री तथा गृहमन्त्री लामिछानेलाई सहकारी ठगी, संगठित अपराध र सम्पत्ति सुद्धीकरणसम्बन्धी कसुरमा अनुसन्धानका लागि प्रहरीले म्याद थप्न ।आइतबार चौँथोपटक कास्की अदातलमा उपस्थित गराइएको थियो ।  रास्वपाको पार्टी कार्यालय काठमाडौंबाटै कात्तिक २ गते पक्राउ परेका लामिछानेमाथि सम्पत्ति शुद्धीकरण र सहकारीको रकम अपचलनमा प्रहरीले एक साथ अनुसन्धान गरिरहेको छ ।

जिल्ला प्रहरी कार्यालय कास्कीले केन्द्रीय अनुसन्धान ब्युरो–सीआइबीको समेत साथ लिएर सम्पत्ति शुद्धीकरणमा लामिछानेको कारोबार खोजी गरिरहेको छ। लामिछानेका आफन्तका कारोबार तथा विदेश रकम पठाएको तथ्य समेत खोजी गर्ने काम भइरहेको अनुसन्धानमा संलग्न अधिकृतले जानकारी दिएका छन् ।