मोरङ । मोरङको  धनपालथान गाउँपालिका ४ कर्सियास्थित उमागौरी कृषि सहकारी संस्थाका अध्यक्षसहित १० जनाविरूद्ध पक्राउ पुर्जी जारी भएको छ।

सहकारीमा भएको बचत अपचलनबारे अनुसन्धानका लागि प्रहरीले सञ्चालक समितिका सदस्य र कर्मचारीहरूविरूद्ध पक्राउ पुर्जी लिएको जिल्ला प्रहरी कार्यालय मोरङका प्रवक्ता डिएसपी वेदप्रकाश जोशीले जानकारी दिनुभयो । 

उहाँले प्रदेश सहकारी रजिस्ट्रारको कार्यालय इटहरीबाट प्राप्त पत्रको आधारमा उक्त सहकारीबारे अनुसन्धान शुरू गरिएको बताउनुभयो । प्रहरी स्रोतका अनुसार पक्राउ पुर्जी जारी भएकाहरूमा सहकारीका अध्यक्ष धनपालथान–४ का शम्भुप्रसाद रौनियार, उपाध्यक्ष कटहरी गाउँपालिका–२ का लक्ष्मण साह, सचिव धनपालथान–४ का आलम अन्सारी मियाँ,  कोषाध्यक्ष धनपालथान–४ का शम्भुप्रसाद सिंह छन्।

त्यस्तै सञ्चालक समितिका सदस्यहरु जहदा गाउँपालिका–४ का आमोद मण्डल, धनपालथान–४ का रोशन राजवंशी धनपालथान–२ का जितमान ठाकुर र  लेखा समितिका संयोजक विजयकुमार यादव, सदस्य सुरेन्द्रकुमार राजवंशी र अशोककुमार विश्वासविरूद्ध प्रहरीले पक्राउ पुर्जी लिएको छ।