काठमाडौँ । मुलुकको विभिन्न समस्याग्रस्त सहकारीबाट बचतकर्ताहरुको डेढ अर्ब  रुपैयाँ भएको छ । 

विभिन्न समस्याग्रस्त सहकारीबाट बचतकर्ताले  ३९ अर्ब ९३ करोड ५६ लाख ६६ हजार ७ सय १० रुपैयाँ पाउनुपर्ने देखिएको तर त्यस मध्ये १अर्ब ५१ करोड ५३ लाख ३६ हजार ८ सय ९९ रुपैयाँ बचत फिर्ता गरिएको सरकारद्वारा गठित समस्याग्रस्त सहकारी व्यवस्थापन समितिले जनाएको छ । 

समितिका अनुसार फिर्ता भएको रकममध्ये १ अर्ब ४८ करोड ५१ लाख ३७ हजार ७१५ रुपैयाँको हिसाब राफसाफ भएको छ । थप ३ करोड १ लाख ९९ हजार रुपैयाँ आंशिक रूपमा फिर्ता गरिएको छ । 

समितिले समस्याग्रस्त घोषणा भएका सहकारीहरूको सम्पत्ति तथा दायित्व व्यवस्थापन गरी बचतकर्ताको बचत फिर्ता कार्य गर्दै आएको छ । समस्याग्रस्त २२ सहकारीका ६२ हजार ७ सय ६० बचतकर्तामध्ये ६ हजार १ सय ५५ बचतकर्ताको बचत रकम फिर्ता भएको समितिले जनाएको छ ।

भूमि व्यवस्था, सहकारी तथा गरिबी निवारणमन्त्री बलराम अधिकारीले २०८० सालपछि समस्याग्रस्त घोषणा भएका बाहेक ओरेन्टलसहित पुराना १२ सहकारीको बचत चालु आवभित्रै राफसफ गर्ने र १० सहकारीको भने चालु आवभित्र ५० प्रतिशत राफसाफ गर्ने सरकारको लक्ष्य रहेको जानकारी गराउनुभएको छ । 

समितिका अनुसार चालु आवमा १३ हजार ०७५ जना ऋणीको २३ अर्ब ६२ करोड ९७ लाख ५९ हजार ऋण असुलीका लागि अन्तिम कारबाही अगाडि बढेको छ । त्यो भनेको ऋणी र जमानतकर्ताको एकाघर परिवारको सम्पत्ति रोक्का र कालोसूचीमा राख्ने हुनेछ । 

समस्याग्रस्त सहकारी व्यवस्थापन समितिका अध्यक्ष श्रीमणकुमार गौतमले तिहारपछि  सहकारीका सञ्चालक समिति र ऋणी सदस्य एकाघर परिवार र जमानतकर्ताको  जायजेथा लिलाम गर्ने,  खाता रोक्का गर्ने गरेर रकम संकलन गरी बचत फिर्ता गरिने बताउनुभयो । 

समस्याग्रस्त सहकारीलाई  बचतकर्ताको रकम फिर्ता गर्न ऋण कात्तिक १५ गते सम्मको समय दिएको र त्यसपछि सम्पत्ति रोक्का गरी लिलाम शुरू हुने उहाँले बताउनुभयो । ‘सहकारीको बचत फिर्ता राज्यबाट हुँदैछ, सहकारीबाट र तिनका सञ्चालक र ऋणीबाट असुल गरेर फिर्ता हुन्छ’ उहाँले भन्नुभयो ।