काठमाडौँ । राष्ट्रिय प्रजातन्त्र पार्टी (राप्रपा)मा केही नेताको जिम्मेवारी हेरफेर भएको छ । केही विभागमा प्रमुख मनोनयन समेत गरिएको छ ।

अध्यक्ष राजेन्द्र लिङ्देनले पार्टीको  केही विभाग प्रमुखको जिम्मेवारी हेरफेर र केही विभागमा प्रमुख मनोनयन गर्नुभएको हो । पार्टीका प्रवक्ता एवं प्रचार विभाग प्रमुख मोहनकुमार श्रेष्ठले  विज्ञप्ति जारी गर्नु भई पार्टी केन्द्रीय अध्यक्ष लिङ्देनले पार्टीको विधानबमोजिम केही विभाग प्रमुखहरूको जिम्मेवारी हेरफेर र केही विभागका प्रमुखहरूको मनोनयन गर्नुभएको जानकारी दिनुभएको छ ।

उहाँका अनुसार सङ्गठन विभागको प्रमुखमा वरिष्ठ नेता उपाध्यक्ष बुद्धिमान तामाङ, स्थानीय तह परिचालन विभागको प्रमुखमा वरिष्ठ नेता एवं उपाध्यक्ष ध्रुवबहादुर प्रधान, राजनीतिक विभागको प्रमुखमा वरिष्ठ उपाध्यक्ष रवीन्द्र मिश्र रहनुभएको छ ।

यसैगरी पर्यटन विभागको प्रमुखमा सहायक महामन्त्री विजय खड्का, विपद् व्यवस्थापन विभागको प्रमुखमा केन्द्रीय सदस्य उद्धव थापा, सूचना प्रविधि विभाग (आइटी) को प्रमुखमा केन्द्रीय सदस्य उद्धवराज भेटुवाल र लेखा समितिको प्रमुखमा केन्द्रीय सदस्य केदार न्यौपाने रहनुभएको जनाएको छ ।

अध्यक्ष लिङ्देनको यो निर्णयले राप्रपाका केही नेता तथा कार्याकर्तामा भने असन्तुष्टि बढेको छ ।  धवल शम्सेर राणालाई संगठन विभागबाट हटाएपछि राप्रपाभित्र असन्तुष्टि बढेको हो । अध्यक्ष राजेन्द्र लिङ्देनले संगठन विभागको प्रमुखबाट राणालाई हटाएर बुद्धिमान तामाङलाई प्रमुख बनाएपछि राप्रपामा असन्तुष्टि देखिएको हो । पार्टीका पूर्वअध्यक्ष डा प्रकाशचन्द्र लोहनीले बिरामी भएर विदेशमा उपचार गराइरहेका बेला राणालाई हटाएकोमा आपत्ति जनाउनुभएको छ । 

अध्यक्ष लिङ्देनको निर्णय लगत्तै पूर्वअध्यक्ष लोहनीले सामाजिक सन्जालमा लेख्नुभएको छ– राप्रपाका सांसद तथा महामन्त्री धवल शम्शेर बिरामी भएर विदेशमा उपचार गराउँदै हुनुहुन्छ । यस्तो बेलामा उहाँलाई सङ्गठन विभागको प्रमुखबाट हटाउनु अविवेकी तथा अ्मानवीय निर्णय हो र बिरामी साथीलार्ई तनाव दिने काम मात्र हो । यो निर्णयप्रति म दुःख व्यक्त गर्दछु र मेरो असहमति स्पष्ट गर्दछु ।’