काठमाडौँ । नेकपा माओवादी केन्द्र निकट अखिल क्रान्तिकारीको सम्मेलनमा कुटाकुट भएको छ । काठमाडौंको कीर्तिपुरमा जारी २३ औँ सम्मेलनमा  उमेर हदको विषयलाई प्रतिनिधिहरुबीच कुटाकुट भएको हो । 

हिजो बसेको माओवादी पदाधिकारी बैठकले उमेर हदमाथि मतदान गराउने तर नेतृत्व चयनमा हस्तक्षेप नगर्ने निर्णय गरेको थियो । तर, कार्यकर्ताले आज सम्मेलनस्थलमा हुलदंगा मच्चाएका छन् ।स्थिति नियन्त्रण गर्न  प्रहरीले सामान्य बल प्रयोग समेत गरेको छ ।

सम्मेलनमा सहभागी विद्यार्थीहरुले उमेर हदको विषयमा पक्ष विपक्षमा  नाराबाजी गरेपछि कुटाकुटको स्थिति आएको हो ।  सम्मेलनमा  विद्यार्थीहरु कुटाकुट गरेको भिडियो नै सार्वजनिक भएको छ । 

अध्यक्षका आकांक्षी केशव रावलले पार्टी गुटले विद्यार्थीमा गुटको उम्मेदवार टुङ्गो लाउन नसक्दा कीर्तिपुरमा असर देखिएको टिप्पणी गरेका छन् । उनले फेसबुकमा लेखेका छन्,– ‘पार्टी गुटहरूले विद्यार्थीमा गुटको उम्मेदवार टुङ्गो लाउन नसक्दा देखिएको असर हो कीर्तिपुर झुर फेरि पनि भन्छु गुटबन्दी अन्त्य गर्नुपर्छ ।’

हिजो पनि सम्मेलनस्थलमा सहभागी प्रतिनिधिसँग २ हजार प्रवेश शुल्क तोकेपछि बन्द सत्र हलमा आन्दोलन भएको थियो ।