सुनसरी । धरानमा पहिलो पटक राष्ट्रिय खुल्ला ब्याडमिन्टन प्रतियोगिता हुने भएको छ । 

धरान ब्याडमिन्टन क्लबले आज पत्रकार सम्मेलन गरी असोजको १७ गते देखि १९ गते तीन दिनसम्म ब्याडमिन्टन प्रतियोगिता हुने जानकारी दिएको हो । आयोजक समितिका संयोजक टङ्कबहादुर लिम्बूका अनुसार प्रतियोगितामा  ७७ वटै जिल्लाका २ सय टिमका ६ सय खेलाडी सहभागी हुनेछन् । सुरक्षा निकायका तीन वटा विभागीय टोली समेत सहभागी हुने उहाँले बताउनुभयो । 

उहाँले भन्नुभयो– ‘खेलको माध्यमबाट आपसी भाइचारा, सद्भाव वृद्धि, साथै धरानको खेल र पर्यटन प्रवद्र्धन गर्ने उद्देश्यले प्रतियोगिता गर्न लागिएको हो ।’ यस्ता प्रतियोगिता हुन नसक्दा युवा प्रतिभा पलायन भई सक्षम खेलाडी उत्पादनमा कमी आएको उहाँको भनाइ छ । प्रतियोगितामा खुल्ला पुरुष डबलतर्फका विजयी जोडीलाई  एक लाख १५ हजार रुपैयाँ, उप विजेताले  ५५ हजार र तेस्रो हुने जोडीले  ३० हजार रुपैयाँसहित मेडल र प्रमाणपत्र प्राप्त गर्ने छन् ।

खुल्ला ‘भेट्रान्स’ ४५ ‘प्लस’, ‘सुपर’ भेट्रान्स ५५ प्लस र ‘लेडिज डबल्स’, ‘मिक्स डबल्स’का विजेताले  ६५ हजार, उपविजेताले  ३३ हजार र तेस्रो हुनेले  ११–११ हजार रुपैयाँसहित मेडल र प्रमाणपत्र प्राप्त गर्ने संयोजक लिम्बूले बताउनुभयो ।
 
प्रतियोगितामा राष्ट्रिय ‘रेफ्री’ तथा प्रशिक्षक केदार धिमाल प्रमुख निर्णायक रहने बताइएको छ । टिम दर्ता शुल्क खुल्ला मेन्स डबल, भेट्रान ४५ प्लस, सुपर भेट्रान ५५ प्लसका प्रतियोगीका लागि ३ हजार, मिक्स डबलका लागि  दुई हजार ५ सय र खुल्ला लेडिज डबलका प्रतियोगीका लागि २ हजार  रुपैयाँ निर्धारण गरिएको धरान ब्याडमिन्टन सङ्घले जनाएको छ ।
 
प्रतियोगिता धरान उपमहानगरपालिका–१३ अमर सेवा समाजको कभर्ड हलमा हुने आयोजकले जनाएको  छ । प्रतियोगिता सञ्चालनमा २२ लाख रुपैयाँ भन्दा बढी खर्च हुने अनुमान आयोजकको छ । 

प्रतियोगितामा कोशी प्रदेश खेलकुद परिषदले ८ लाख, धरान उपमहानगरपालिकाले १ लाख ५० हजार रुपैयाँ, विभिन्न वित्तीय सङ्घसंस्था र प्रायोजकबाट रकम सङ्कलन गरिएको आयोजकले जनाएको छ ।