धनुषा । जिल्ला प्रहरी कार्यालय धनुषाको हिरासत फोडेर भागेका ९ जना थुनुवामध्ये  ७  जना पक्राउ परेका छन्। सोमबार बिहान हिरासतको भेन्टिलेशन फोडेर भागेका ९ थुनुवामध्ये ७ जनालाई  पक्राउ गरिएको जिल्ला प्रहरी कार्यालय धनुषाका डिएसपी रञ्जन अवाले जानकारी दिनुभयो । 

फरारमध्ये सत्यम झालाई प्रहरीले बिहानै पक्राउ परेको थियो । उनलाई जनकपुरबाट पक्राउ गरिएको थियो। मनिष मण्डल र विशाल मुखिया फरार छन्। उनीहरूको खोजी भइरहेको प्रहरीले जनाएको छ । 

अन्य फरारहरु मध्ये अमितकुमार झा, रञ्जित मण्डल, रोशनकुमार मण्डल, भाष्करकुमार यादव पक्राउ परेका छन् । उनीहरू लागुऔषध  खैरो हेरोइनसहित पक्राउ परेका थिए। सुमित मेस्तर र बिक्की कार्कीलाई पनि दिउँसो पक्राउ गरिएको हो। उनीहरूलाई धनुषाको औरही गाउँपालिकास्थित नेपाल भारत सिमा आसपासबाट पक्राउ गरिएको डिएसपी अवाले जानकारी दिनुभयो ।  

आज बिहान करिब ४ बजेको समयमा थुनुवा कक्षको भेन्टिलेशन फोडेर उनीहरु भागेका थिए। हिरासतमा १० जना रहेकामा एक जना भने भागेका थिएनन्। 

कार्यालयमा सेन्ट्री पनि खटिएका थिए तर कसरी थाहा पाएनन् भन्ने बारे अनुसन्धान हुने प्रहरीले जनाएको छ । पहिले फरारहरूलाई खोजी गर्छौं। त्यसपछि उनीहरू कसरी भाग्न सफल भए भन्नेबारे अनुसन्धान गर्छौं, डिएसपी अवाले भन्नुभयो ।