काठमाडौँ । उपप्रधानमन्त्री एवं अर्थमन्त्री विष्णुप्रसाद पौडेल र अन्तर्राष्ट्रिय मुद्रा कोष (आएएमएफ) को एशिया प्रशान्त क्षेत्र उपनिर्देशक रुपा दत्त गुप्ताबीच भेटवार्ता भएको छ ।

उहाँहरुबीच अर्थ मन्त्रालयमा  भेटवार्ता भएको हो ।  भेटवार्तामा उपनिर्देशक दत्त गुप्ताले नेपालको अर्थतन्त्र सुधार हुँदै गएको आफूले पाएको बताउनुभएको अर्थ मन्त्रालयले जनाएको छ । 

भेटवार्तामा उहाँले नेपालमा लगानी सहजीकरण सम्बन्धी कानुन परिमार्जन हुँदै गएको, राजस्व परिचालन रणनीति कार्यान्वयनमा आएको, अर्थतन्त्रसम्बन्धी विभिन्न सुझाव कार्यान्वयन हुँदै गएकाले आफू उत्साहित भएको धारणा व्यक्त गर्नुभएको अर्थमन्त्री पौडेलको सचिवालयले जनाएको छ । 

त्यस अवसरमा उपप्रधानमन्त्री एवं अर्थमन्त्री पौडेलले अर्थतन्त्रलाई सुदृढ गर्न सरकारले योजनावद्ध रुपमा काम गरिरहेको जानकारी गराउनुभएको थियो ।