कैलाली ।  कैलाली भन्सार कार्यालय धनगढीले ११ महिनामा ७ अर्ब ३२ करोड १४ लाख रुपैयाँ राजस्व सङ्कलन गरेको छ । भन्सार कार्यालयले चालु आव २०८०/८१ को साउनदेखि जेठ मसान्तसम्म उल्लेखित राजस्व सङ्कलन गरेको हो ।

कार्यालयले सो अवधिमा भन्सार महशुलतर्फ २ अर्ब ७७ करोड ५८ लाख, मूल्य अभिवृद्धि करतर्फ २ अर्ब ९५ करोड ५२ लाख, अन्तःशुल्कतर्फ  १८ करोड ९५ लाख र अन्यतर्फ  एक अर्ब ४० करोड ८ लाख रुपैयाँ राजस्व सङ्कलन भएको कैलाली भन्सार कार्यालयका सूचना अधिकारी पवित्रकुमार खड्काले जानकारी दिनुभयो ।

चालु आवमा भन्सार कार्यालयको  ११ अर्ब ५८ करोड २४ लाख रुपैयाँ राजस्व सङ्कलनको वार्षिक लक्ष्य रहेकामा ११ महिनामा सङ्कलन भएको राजस्व वार्षिक लक्ष्यको ६३ दशमलव २१ प्रतिशत रहेको उहाँले जानकारी दिनुभयो ।

सूचना अधिकारी खड्काका अनुसार चालु आवको साउनमा  ४६ करोड ८२ लाख, भदौमारु ५१ करोड ९३ लाख, असोजमा ६३ करोड १४ लाख, कात्तिकमा . ६१ करोड ४६ लाख, मङ्सिरमा  ७३ करोड ३४ लाख र पुसमा  ६८ करोड ९० लाख रुपैयाँ राजस्व सङ्कलन भएको छ ।

माघमा र ६६ करोड ६७ लाख, फागुनमा  ६९ करोड एक लाख, चैतमा  ७२ करोड १३ लाख, वैशाखमा  ७५ करोड १७ लाख र जेठमा  ८३ करोड ५३ लाख रुपैयाँँ राजस्व सङ्कलन भएको उहाँले जानकारी दिनुभयो ।

‘आयातमा वृद्धि हुन सकेको छैन, निर्यात नगन्य मात्रामा हुन्छ, पूँजीगत खर्च कम छ’ सूचना अधिकारी खड्काले भन्नुभयो– ‘बढी राजस्व सङ्कलन हुने वस्तुको आयातमा कमी छ, जसले गर्दा राजस्व सङ्कलन लक्ष्यमा पुग्न सकिरहेको छैन, अब एक महिना मात्रै बाँकी छ, राजस्व सङ्कलन लक्ष्यमा पुग्ने सम्भावना न्यून छ ।’

भन्सार कार्यालयको गत आव २०७९/८० मा  १२ अर्ब ३० करोड ६६ लाख रुपैयाँ राजस्व सङ्कलनको वार्षिक लक्ष्य रहेकामा ८ अर्ब २९ करोड ६३ लाख रुपैयाँ राजस्व सङ्कलन भएको थियो । त्यो लक्ष्यको ६७ दशमलव ४१ प्रतिशत मात्रै रहेको कार्यालयले जनाएको छ ।