बागलुङ । नेपालको प्रसिद्ध धार्मिक शक्तिपीठ बागलुङ कालिका भगवती मन्दिरमा जेठमा  १८ लाख रुपैयाँ सङ्कलन भएको छ । 

कालिका भगवती मन्दिर गुठी व्यवस्थापन समितिले सार्वजनिक गरेको जेठको आम्दानी खर्च विवरणअनुसार  १८ लाख २६  हजार रुपैयाँ  सङ्कलन भएको छ । त्यो रकम भने चालु वर्षकै सबैभन्दा थोरै हो । गत महिना वैशाखमा मात्रै कालिका भगवती गुठी व्यवस्थापन समितिले ५८ लाख २४ हजार रुपैयाँ सङ्कलन गरेको थियो । 

कालिका गुठी व्यवस्थापन समितिका अध्यक्ष कुमार खड्काका अनुसार जेठमा १८ लाख २६ हजार आम्दानी र  १० लाख २१ हजार खर्च भएर ८ लाख ५ हजार रुपैयाँ बचत भएको बताउनुभयो । खड्काले बागलुङ कालिका भगवती मन्दिर दर्शन गर्न आउने श्रद्वालु भक्तजनलाई बास बस्नका लागि बागलुङ नगरपालिका–१ मालढुङ्गा नजिकै धर्मशाला निर्माणका लागि विस्तृत अध्ययन प्रतिवेदन (डिपिआर) निर्माण गर्न थालिएको उहाँले जानकारी दिनुभयो । उहाँले मन्दिरको भेटीबाट धर्मशाला निर्माण गरिनेछ । 

जेठमा भक्तजनले मन्दिरमा चढाएको भेटी  ११ लाख ९६ हजार २ सय ६५, सटर भाडाबाट ३ लाख  ६ हजार ४ सय, आर्थिक सहयोग बापत  ५६ हजार ६ सय ८३, परेवा बिक्रीबाट २ लाख ४० हजार ७ सय ५०, चामल बिक्रीबाट ९ हजार, बोकाको टाउको बिक्रीबाट  ११ हजार ९ सय, कुखुरा बलिबाट ९ सय, राँगा बलिबाट ३ हजार  ६ सय, विवाहबाट १ हजार र पण्डितबाट ४ सय रुपैयाँआम्दानी गरेको अध्यक्ष खड्काले जानकारी दिनुभयो । 

जेठमा कर्मचारीको तलबभत्तामा चार लाख ३४ हजार, विद्युत्मा २९ हजार पाँच सय ८०, अतिथि सत्कारमा  ४६ हजार, उपहार ९ हजार, पूर्वाधारतर्फ २ लाख ३६ हजार, पूजा खर्च ५५ हजार, जग्गा व्यवस्थापन  १ लाख ५० हजार, खाद्य तथा आवास ५७ हजार र विज्ञापनमा ५ हजार रुपैयाँ खर्च भएको अध्यक्ष खड्काले बताउनुभयो ।