काठमाडौँ । नेपाल स्टक एक्सचेञ्ज (नेप्से) परिसूचक फेरि उच्च अंकले बढेको छ । 

साता कारोबारको  दोस्रो दिन  पछिल्लो चार महिनायताकै उच्च रकम कारोबार भएको छ । आइतबार ४५ दशमलव ६९ अंकले  बढेको  नेप्से परिसूचक आज फेरि २७ दशमलव ५४ अंकले उकालो लागेर २ हजार ९२ को बिन्दुमा पुगेको छ । 

आज ३ सय १५ कम्पनीको एक करोड ४३ लाख ७० हजार ६ सय ८९ कित्ता शेयर, ८० हजार ९ सय ८२ पटक खरिद बिक्री हुँदा ५ अर्ब ८५ करोड ४३ लाख ५४ हजार २ सय १२ बराबरको कारोबार भएको छ । यो कारोबार रकम गत पुस २७ गते यताकै उच्च हो । आजको कारोबारपछि कूल बजार पुँजीकरण  ३३ खर्ब १७ अर्ब २९ करोड ६५ लाख ८० हजार रुपैयाँ हाराहारी पुगेको छ ।

आजको कारोबारमा वित्त समूह शून्य दशमलव ५७, जीवन बीमा समूह शून्य दशमलव ०८, उत्पादन तथा प्रशोधन शून्य दशमलव ५२, लघुवित्त शून्य दशमलव ६५ र अन्य समूहको उपसूचक शून्य दशमलव ५० प्रतिशतले घटेको छ भने अरु सबै समूहको उपसूचक बढेको छ । सबैभन्दा धेरै बैंकिङ समूहको उपसूचक चार दशमलव १८ प्रतिशतले बढेको छ । त्यस्तै विकास बैंक शून्य दशमलव ४२, होटल तथा पर्यटन शून्य दशमलव ३९, जलविद्युत् एक दशमलव ३८, लगानी एक दशमलव ८४, म्युचुअल फन्ड एक दशमलव २४, व्यापार दुई दशमलव २३ र अन्य समूह शून्य दशमलव ५२ प्रतिशतले बढेको छ ।  

सामुदायिक लघुवित्त वित्तीय संस्था लिमिटेड, बुद्धभूमि नेपाल हाइड्रोपावर कम्पनी लिमिटेड, भगवती हाइड्रोपावर डेभपलमेन्ट कम्पनी लिमिटेड र नेरुडे मिर्मिरे लघुवित्त वित्तीय संस्था लिमिटेडको शेयर मूल्यमा सकारात्मक सर्किट लागेको छ । सबैभन्दा धेरै घट्नेमा भने उपकार लघुवित्त वित्तीय संस्था लिमिटेडको शेयर मूल्य ७ दशमलव ४० र सृजनशील लघुवित्त वित्तीय संस्था लिमिटेडको शेयर मूल्य ६दशमलव ३५ प्रतिशतले घटेको छ ।

कारोबार रकमका आधारमा आज सबैभन्दा धेरै पोखरा फाइनान्स लिमिटेड १९ करोड ९२ लाख ९९ हजार ८ सय २४ रुपैयाँँ बराबरको कारोबार भएको छ । कारोबार भएका शेयर सङ्ख्याका आधारमा भने कुमारी बैंक लिमिटेडको ४ लाख ४३ हजार ५८ कित्ता शेयर खरिद बिक्री भएको छ ।