रुकुम। रुकुम पश्चिमको आठबिसकोट नगरपालिकामा आज भएको ट्र्याक्टर दुर्घटनामा जीवन गुमाउनेहरुको सनाखत भएको छ । 

नगरपालिकाको वडा नम्बर १४ स्थित छेपारे नजिकै भेरी नदीमा ट्र्याक्टर खस्दा २ जनाको मृत्यु भएको छ । दुर्घटनामा ३  जना घाइते भएका छन् । 

आठबिसकोटदेखि जाजरकोट रिम्नातर्फ जाँदै गरेको नम्बर नखुलेको ट्र्याक्टर आज दिउँसो भेरी नदीमा खसेको हो । दुर्घटनामा ट्र्याक्टर चालक तथा मालिक आठबिसकोट–१४ का २२ वर्षीय विकास खड्का र त्यही ठाउँका १८ वर्षीय हरि शर्माको घटनास्थलमै मृत्यु भएको प्रहरी कार्यालय रुकुम पश्चिमका सूचना अधिकारी एवं प्रहरी निरीक्षक विष्णुप्रसाद श्रेष्ठले जानकारी दिनुभयो । 

दुर्घटनामा घाइते ३ जनाको मिसन अस्पताल चौरजहारीमा उपचार भइरहेको छ । घाइतेको पहिचान खुल्न सकेको छैन । ट्र्याक्टर सडकदेखि एक सय ५० मिटर तल भेरी नदीमा खसेको हो । दुर्घटनाबारे अनुसन्धान भइरहेको जिल्ला प्रहरी कार्यालयले जनाएको छ ।