कैलाली । यातायात व्यवस्था कार्यालय धनगढीले चालु आर्थिक वर्षको हालसम्म ५१ करोड रुपैयाँ बढी राजश्व सङ्कलन गरेको छ । 

यातायात कार्यालयले चालु आब २०८०/८१ को हालसम्म विभिन्न राजश्व शीर्षकबाट ५१ करोड ७८ लाख ७७ हजार ३ सय ९१ रुपैयाँ  राजश्व सङ्कलन गरेको यातायात व्यवस्था कार्यालय धनगढीका निमित्त कार्यालय प्रमुख नरेन्द्र शाहले जानकारी दिनुभएको छ ।

निमित्त प्रमुख शाहका अनुसार कार्यालयले सवारी साधन करबाट सबैभन्दा बढी  ४० करोड २८ लाख ५२ हजार १ सय ७३ रुपैयाँ राजश्व सङ्कलन गरेको छ । सबैभन्दा कम अन्य प्रशासनिक सेवा शुल्कबाट १९ हजार ९ सय रुपैयाँ राजश्व सङ्कलन गरेको छ । चालक अनुमति पत्र, सवारी दर्ता किताब सम्बन्धी दस्तुरबाट १० करोड ६० लाख ७२ हजार ९ सय८ , बाटो इजाजत, प्रदूषण र जाँचपासबाट ८३ लाख ५७ हजार ८५ र व्यवसाय रजिष्ट्रेसन दस्तुरबाट ४५ लाख ६ हजार ५ सय २५ रुपैयाँ राजश्व सङ्कलन गरेको छ । 

चालु आवमा कार्यालयको बेरुजु रकम एक लाख १८ हजार ८ सय रुपैयाँ रहेको कार्यालयका निमित्त प्रमुख शाहले बताउनुभयो ।  यातायात व्यवस्था कार्यालयले अघिल्लो आर्थिक वर्ष २०७९/८० मा विभिन्न राजश्व शीर्षकबाट   ६३ करोड ९४ लाख ३० हजार ४ सय १४ रुपैयाँ राजश्व सङ्कलन गरेको उहाँले बताउनुभयो ।
   
जस अन्तर्गत कार्यालयले सवारी साधन कर शीर्षकबाट सबैभन्दा बढी ४७ करोड १७ लाख ७२ हजार १ सय ४४ रुपैयँँ र सबैभन्दा कम अन्य प्रशासनिक सेवा शुल्क शीर्षकबाट २० हजार रुपैयँँ राजश्व सङ्कलन गरेको थियो । चालक अनुमति पत्र, सवारी दर्ता किताब सम्बन्धी दस्तुरबाट १५ करोड ४२ लाख ७६ हजार ७ सय २५, बाटो इजाजत, प्रदूषण र जाँचपासबाट १ करोड २२ लाख ६ हजार ५० र व्यवसाय रजिष्ट्रेशन दस्तुरबाट ९ लाख ९२ हजार १५ रुपैयाँ राजश्व सङ्कलन गरेको छ ।
  
यस आर्थिक बर्षमा बेरुजु रकम १ लाख ६३ हजार ४सय ८० रुपैयाँ रहेको कार्यालयका निमित्त प्रमुख शाहले बताउनुभयो । कार्यालयले आर्थिक वर्ष २०७८/७९ मा विभिन्न राजश्व शीर्षकबाट  ५५ करोड ३६ लाख ४६ हजार १ सय ९२ रुपैयाँ राजश्व सङ्कलन गरेको जनाइएको छ ।