भक्तपुर । भक्तपुरमा कार र स्कुटर ठोक्किँदा एक जनाको मृत्यु भएको छ । 

सूर्यविनायक नगरपालिका‐५ सृजनानगरमा जगातीबाट  काठमाडौँतर्फ जाँदै गरेको बाग्मती प्रदेश नम्बर ०१ ०३० च ०९९५ नम्बरको कार र  त्यहीदिशातर्फ जाँदै गरेको बा ७३ प २८३६ नंको स्कुटर एकआपसमा ठोकिएको हो । 

सोमबार दिउँसो भएको दुर्घटनामा घाइते  स्कुटर चालक रामेछाप लिखु तामाकोशी गाउँपालिका‐४ घर भई हाल काठमाडौँ माइतीघर  बस्ने २३ वर्षीय सुजन तामाङको  मृत्यु भएको प्रहरीले जनाएको छ । 

सुजनको मध्यपुरथिमी अस्पतालमा उपचारका क्रममा मंगलबार मृत्यु भएको भक्तपुरका प्रहरी नायव उपरीक्षक राजन कार्कीले जानकारी दिनुभएको छ । 

स्कुटर पछाडि सवार भक्तपुर सल्लाघारी बस्ने २३ वर्षीय  राज तामाङको भने मध्यपुरथिमी अस्पतालमा उपचार भइरहेको छ ।  कार चालक सुनसरी धरान उप–महानगरपालिका‐१३ घर भई हाल काठमाडौँ कलङ्की बस्ने ३१ वर्षीय आशीष श्रेष्ठलाई प्रहरीले पक्राउ गरेको छ ।