काठमाडौँ । महोत्तरीको एकडारा गाउँपालिकाका तत्कालीन उपाध्यक्षसहित  ६ जनाविरुद्ध भ्रष्टाचार अभियोगमा मुद्दा दायर भएको छ । 

गाउँपालिकाको वडा नम्बर  १ मा सडक ढलानका क्रममा अनियमितता गरेको आरोपमा गाउँपालिका तत्कालीन उपाध्यक्ष महजबी खातुनसहित ६ जनाविरुद्ध अख्तियार दुरुपयोग अनुसन्धान आयोगले शुक्रबार विशेष अदालतमा मुद्दा दायर गरेको हो ।

आयोगले गाउँपालिका उपाध्यक्ष खातुन, तत्कालीन प्रमुख प्रशासकीय अधिकृत सरोजकुमार सिंह, इन्जिनियर सुभाष पाण्डेय, योजना शाखा प्रमुख महेन्द्रकुमार मण्डल र असिस्टेन्ट सब इन्जिनियर सञ्जयकुमार मण्डल र जानकी कन्स्ट्रक्सन मनरा महोत्तरीका सञ्चालक राकेशकुमार रायविरुद्ध ८ लाख ६५ हजार १ सय ४५ रुपैयाँ बराबरको बिगो माग दाबी गर्दै  मुद्दा दायर गरिएको जनाएको छ ।

गुणस्तरहीन काम गरेको र त्यसलाई सदर गरी राज्यको स्रोतको दुरुपयोग गरेको पाइएकाले उनीहरुविरुद्ध मुद्दा दायर गरिएको आयोगका प्रवक्ता नरहरि घिमिरेले जानकारी दिनुभएको छ ।