काठमाडौँ । वैशाख १० गते बौद्ध क्षेत्रमा मनाउन लागिएको बौद्ध तेमाल जात्राको तयारी पूरा भएको छ । 

बौद्ध तामाङ कल्याण गुठीको संयोजन र बौद्धनाथ क्षेत्र विकास समितिको आयोजनामा हुन लागेको जात्राको आवश्यक तयारी पूरा भएको बिहीबार आयोजित पत्रकार सम्मेलनमा जानकारी दिइएको छ । प्रत्येक वर्षको चैत पूर्णिमाको अघिल्लो दिन मनाइने यो जात्रा यस वर्ष वैशाख १० गरे मनाउन लागिएको हो । जात्रा सम्पन्न गर्नका विभिन्न उपसमिति गठन गरिएको छ ।

काभ्रेपलाञ्चोकस्थित तेमाल क्षेत्रका तामाङ समुदाय आफ्ना दिवङ्गको आत्माको चीर शान्तिको कामना गर्दै बौद्ध महाचैत्यमा पूजाआज गर्ने, दीप प्रज्वलन गर्ने भएकाले यस जात्राको नाम तेमाल जात्रा रहन गएको हो ।

जात्रामा काभ्रेपलाञ्चोकलगायत विभिन्न स्थानमा बसोबास गर्ने तेमालहरुको उपस्थिति रहने आयोजकको भनाइ छ ।  जात्रामा पितृ मोक्षका लागि बालाजु बाइसधारामा स्नान गरी स्वयम्भूको महाचैत्यमा पुगेर पूजा गर्ने चलन छ । उनीहरु रातभर जाग्राम बसी छयोइमे बत्ती बाली पितृको मोक्षका लागि कामना समेत गर्दछन् । 

जात्रामा नेपालका विभिन्न जिल्ला तथा भारत लगायतका मुलुकबाट ६० हजारभन्दा बढी भक्तजनहरु सहभागी हुने आयोजकको भनाइ छ ।