सर्लाही । प्रहरीले हुण्डी कारोबार गरेको आरोपमा दुई जनालाई पक्राउ गरेको छ । ठूलो परिणाममा स्रोत नखुलेको रकमसहित उनीहरुलाई पक्राउ गरिएको हो । 

सोमबार गोप्य सूचनाका आधारमा प्रहरीले  २७ लाख ७५ हजार सय ७० रुपैयाँँसहित उनीहरुलाई पक्राउ गरेको जनाएको छ । पक्राउ पर्नेमा मलङ्गवा नगरपालिका–३ बस्ने २४ वर्षका कमर राजा र लालबन्दी नगरपालिका–७, घरभई मलङ्गवा नगरपालिका–९, स्थित फोन सिटी मोबाइल पसल सञ्चालन गर्ने ४० वर्षका आरिफ अन्सारी छन् । 

प्रहरीका अनुसार मलङ्गवा नगरपालिका–९ बाट  १० लाख र लक्ष्मी सनराइज बैंकको खातामा ९ लाख ९० हजार रुपैयाँ जम्मा गर्ने दुईवटा भौचरसहित पक्राउ गरिएको हो ।

जिल्ला प्रहरी सर्लाहीका सहायक सूचना अधिकारी सविनकुमार कार्कीले राजालाई पैसासहित पक्राउ गरिएको हो । साथै राजासँग सोधपुछ गर्ने क्रममा उनले पैसा अन्सारीको भनेपछि प्रहरीले अन्सारीको मोबाइल पसलमासमेत छापा मारेको थियो । पसलबाट स्रोत नखुलेको १७ लाख ७५ हजार  सय ७० रुपैयाँ बरामद भएको प्रहरीले जनाएको छ । 

प्रहरीले अन्सारीको मोबाइल पसलमा लुकाइएको अवस्थामा  एक हजार रुपैयाँ दरका एक हजार चार सय ५४ थान,  ५ सय रुपैयाँ दरका ६ सय रुपैयाँका २२ थान,  एक सय रुपैयाँ दरका एक सय ९ थान,  ५० रुपैयाँको एक थान र  २० रुपैयाँको एक थान नेपाली नोट बरामद गरेको हो । 

पक्राउ परेका राजा र अन्सारीले बरामद रकमको स्रोत बताउन नसकेपछि उनीहरुले अवैध हुण्डी कारोबार गरेको आशङ्कामा अनुसन्धान शुरु गरिएको जिल्ला प्रहरी प्रमुख दयानिधि ज्ञावालीले जानकारी दिनुभएको छ ।

दुवैलाई जिल्ला प्रहरीको हिरासतमा राखेर अनुसन्धान भइरहेको उहाँको भनाइ छ । उनीहरुलाई प्रहरीले आइतबार नै पक्राउ गरेको भए पनि सोमबार बिहान पत्रकार सम्मेलन गरेर सार्वजनिक गरिएको छ ।