काठमाडौँ । सांसदहरुले संसदमा उठाएका विभिन्न क्षेत्रका  विषयमा प्रधानमन्त्रीले सोमबार जवाफ दिनुहुने भएको छ । 
 
प्रधानमन्त्री पुष्पकमल दाहालले  संसदमा विपक्षी दल लगायत सांसदहरुले  प्रतिनिधिसभामा उठाएका  समसामयिक विषयमा सभामुखको रुलिङपछि जवाफ दिन लाग्नुभएको मन्त्रिपरिषद्को कार्यालयले संसद् सचिवालयलाई शुक्रबार पत्र पठाउँदै जानकारी गराएको छ । मन्त्रिपरिषद्को कार्यालयले पत्रमा कार्यव्यस्तताका कारण प्रधानमन्त्रीले सांसदका प्रश्नहरुको जवाफ सदनमा दिन नसक्नुभएको  उल्लेख गरेको छ । 
 
तथा मन्त्रिपरिषद्को कार्यालयका सचिव डा गणेशप्रसाद पाण्डेयले आज सङ्घीय संसद्का महासचिवलाई पठाउनुभएको पत्रमा ‘आज सम्माननीय प्रधानमन्त्री पुष्पकमल दाहालले सङ्घीय संसद्को प्रतिनिधिसभामा सम्बोधन गर्ने कार्यक्रम रहेकामा उहाँ कामविशेषले काठमाडौँ उपत्यकाबाहिर रहनुभएको हुँदा यही फागुन २१ गते सम्बोधन गर्ने गरी व्यवस्था गर्न’ अनुरोध गर्नुभएको छ ।   

प्रतिनिधिसभाको शुक्रबारको बैठकमा सांसदहरुले मुलुकको समसामयिक विषयमा प्रधानमन्त्रीले जवाफ दिनुपर्ने माग गरेपछि सभामुख देवराज घिमिरेले यही फागुन २१ गतेको बैठकमा जवाफ दिन सरकारलाई निर्देशन दिनुभएको थियो ।

बैठकमा प्रमुख प्रतिपक्षी  दल नेपाल कम्युनिष्ट पार्टी (एमाले) र राष्ट्रिय प्रजातन्त्र पार्टीका सांसदले प्रधानमन्त्रीको जवाफ माग गर्नुभएको थियो ।