काठमाडौँ । मध्य गाजाको नुसिरात शरणार्थी शिविरमा इजरायली आक्रमणमा १७ जनाको मृत्यु भएको छ । 

शरणार्थी शिविरमा एक घरमा भएको हवाई आक्रमणमा कम्तीमा १७ जना प्यालेस्टिनी मारिएको र अन्य ३४ जना घाइते भएको स्थानीय चिकित्सा स्रोतले बताएको छ। स्रोतले उद्धार प्रयास जारी रहेको र हताहत हुनेमा महिला र बालबालिका पनि रहेको बताएको छ । पीडितलाई देइर अल–बलाह सहरको अल–अक्सा शहीद अस्पतालमा सारिएको छ । 

प्रत्यक्षदर्शीहरूले एक इजरायली युद्धक विमानले धेरै विस्थापित परिवारलाई आश्रय दिइरहेको घरमा अनेकौँ मिसाइल प्रहार गरेको बताएका छन् । ठूलो विस्फोटबाट भवन ध्वस्त भएको र शिविरको पश्चिमी भागमा छिमेकीको घरमा गम्भीर क्षति पुगेको छ । 

यसैबीच हमासद्वारा सञ्चालित स्वास्थ्य मन्त्रालयले बुधबार विज्ञप्ति जारी गर्दै गाजापट्टीमा इजरायली आक्रमणमा मर्ने प्यालेस्टिनीको सङ्ख्या बढेर २९ हजार तीन सय १३ पुगेको र ६९ हजार ३ सय ३३ जना घाइते भएको जनाएको छ ।