तनहुँ । आर्थिक वर्षमा तनहुँमा विकास बजेट खर्च सन्तोषजनक नभएको पाइएको छ। साउनदेखि माघ मसान्तसम्म सात महिनाको अवधिमा विकास बजेटतर्फ १७ प्रतिशत मात्रै खर्च भएको छ । 

पुँजीगततर्फ सङ्घीय सरकारमार्फत ३ अर्ब ७५ करोड ८२ लाख ७६ हजार ८ सय २९ रुपैयाँ विनियोजन भएकामा  ६३ करोड ८८ लाख ६१ हजार ४ सय ९२ रुपैयाँ खर्च भएको प्रमुख कोष नियन्त्रक विनोद भट्टराईले जानकारी दिनुभएको छ। कोष नियन्त्रक भट्टराईका अनुसार चालुतर्फ ८ अर्ब ७६ करोड ३६ लाख १७ हजार ६१ रुपैयाँ विनियोजन भएकामा ४ अर्ब ७७ करोड ४६ लाख ६८ हजार ४ सय ८२ रुपैयाँ खर्च भएको छ । यो ५४.४८ प्रतिशत हो ।

प्रदेश सरकारमार्फत विनियोजित बजेटमध्ये पुँजीगततर्फ २१.६४ प्रतिशत बजेट खर्च भएको छ । माघ मसान्तसम्ममा सङ्घ भन्दा प्रदेश सरकार मातहतका कार्यालयले विकास बजेट बढी खर्च गरेका कोष नियन्त्रक भट्टराईले बताउनुभयो । पुँजीगततर्फ २ अर्ब ६२ करोड ५५ लाख १३ हजार रुपैयाँ विनियोजन भएकामा ५६ करोड ८२ हजार ४८ लाख २ सय ६६ रुपैयाँ खर्च भएको उहाँले बताउनुभयो । 

चालुतर्फ  ८३ करोड ६४ लाख ८९ हजार ४ सय विनियोजन भएकामा  २६ करोड ६६ लाख २ हजार ४७ रुपैयाँ अर्थात  ३१.८७ प्रतिशत बजेट खर्च भएको छ । योजना छनोट गरेर लागू गरेपछि शुरुको त्रैमासिकमा बोलपत्र प्रक्रिया हुने, बोलपत्र प्रक्रिया पूरा भएर काम शुरु गर्न तीन महिना लगाउने र कामको गति नबढाउने लगायत कारणले विकास बजेटको खर्च न्यून देखिएको कार्यालयले जनाएको छ । 

कार्यालयका अनुसार ७ महिनामा सङ्घ र प्रदेशको गरी १८ दशमलव ९१ प्रतिशत विकास अर्थात पुँजीगत बजेट खर्च भएको छ । पुँजीगत बजेट ६ अर्ब ३८ करोड ३७ लाख ८९ हजार ८ सय २९ रुपैयाँ मा १ अर्ब २० करोड ७१ लाख ९ हजार ७ सय ५९ रुपैयाँ खर्च भएको छ । चालुतर्फ ५२ दशमलव ५१ प्रतिशत खर्च भएको छ । चालुतर्फ ९ अर्ब ६० करोड १ लाख ६ हजार ४ सय ६४ रुपैयाँ खर्च भएको कोष नियन्त्रण कार्यालयले जनाएको छ ।

चालु आर्थिक वर्षको माघ मसान्तसम्ममा सङ्घ सरकारतर्फ ६ अर्ब ६२ करोड ७६ लाख ६२ हजार १ सय ८८ रुपैयाँ राजस्व सङ्कलन भएको छ ।  प्रदेशतर्फ १४ करोड ५२ लाख ३८ हजार ५  सय ८८ राजस्व सङ्कलन भएको कोष नियन्त्रक भट्टराईले जानकारी दिनुभएको छ।