काठमाडौँ । पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले माओवादीले सत्ता प्राप्तिका लागि मात्र सशस्त्र युद्ध गरेको बताउनुभएको छ । 

एमाले अध्यक्ष ओलीले मंगलबार काठमाडौंमा आयोजित मानव अधिकार रक्षकहरुको चौथो राष्ट्रिय सम्मेलनमा  सशस्त्र युद्धको बेला जथाभावी गोली हान्ने र त्यसलाई नियन्त्रण गर्न टाउको मूल्य तोक्ने अहिले सत्तामा आलोपालो गरिरहेको टिप्पणी गर्नुभयो । ‘राज्यको तर्फबाट मानवअधिकार उल्लंघन गर्नेहरु, विद्रोही भनिनेहरु अहिले शासक भएका छन्’ उहाँले भन्नुभयो– ‘अहिले किन मानवअधिकारको इस्यु ?  गोली हान्ने र टाउकाको मूल्य तोक्ने सँगै मिलेका छन् । लडाइँ केका लागि ? दुई दुई वर्ष प्रधानमन्त्रीका लागि न रहेछ ।’

प्रमुख प्रतिपक्ष दलका नेता ओलीलेले प्रधानमन्त्री पुष्पकमल दाहाल प्रचण्डप्रति लक्षित गर्दै ‘सत्ता र प्रधानमन्त्रीका लागि १७ हजार मानिस मर्नुपर्ने ?’ भन्ने टिप्पणी गर्नुभयो ।  ‘हिंसा शुरु गरेको मिति ०५२ सालबाट ०६३ सालमा आइपुग्दा केमा फरक परेको थियो ?  के कारणले फेरि त्यही व्यवस्था, त्यही प्रणालीमा आउनुपरेको थियो । त्यही संसदमा नलडीकन हिस्सा लिइयो । सरकारमा चुनाव नलडी पुगियो । अनि हिंसा छोडियो’  उहाँले भन्नुभयो–  ‘के भएर ?  किन त्यत्ति थियो त्यसको उद्देश्य ?  पार्लियामेन्टमा अच्छाखासा सिट संख्या र सरकारमा राम्रो हिस्सा । अरु त केही प्राप्त गरेको देखिँदैन । भनेपछि हिंसा किन गरेको थियो अहिलेसम्म पुष्टि छैन ।’

एमाले अध्यक्ष ओलीले माओवादी युद्ध औचित्यहीन रहेको प्रस्ट्याउनुभयो । ‘२०४७ सालको संविधानले शान्तिपूर्ण बाटाहरु बन्द नगरेको अवस्थामा माओवादीले हिंसात्मक बाटो रोज्नु गलत थियो’ उहाँले भन्नुभयो –  ‘यो कुनै राणा शासन थिएन, पञ्चायती थिएन । संगठन गर्न नपाइने, बोल्न नपाइने, विचार व्यक्त गर्न नपाइने अवस्था थिएन । अनि फेरि हिंसा किन गर्नुपर्यो, अलिक पछि हिंसा बिसाएर फेरि आउनुपर्यो ।’

अध्यक्ष ओलीले माओवादी विध्वंसकै कारण देश तहसनहस भएको र युवा विदेश पलायन हुने अवस्था आएको धारणा व्यक्त गर्नुभयो। ‘राज्य जोगाउने नाउँमा वा जनयुद्ध चलाएर सत्ता कब्जा गर्ने नाउँमा चाहिएको सत्ता रहेछ’ उहाँले भन्नुभयो–‘जम्माजम्मी सत्ता। सरकार रहेछ, सांसद रहेछ। चाहिएको त प्रधानमन्त्री न रहेछ। अनि त्यत्तिका लागि यत्रो मान्छे मर्नुपर्ने ?’

एमाले अध्यक्ष ओलीले संक्रमणकालीन न्यायसँग सम्बन्धित कानुन १८ वर्षसम्म नटुंगिनु बिडम्वना भएको उल्लेख गर्नुभयो ।  ‘सशस्त्र युद्धमा सहभागीहरु नै शासक भइसक्दा समेत पीडितलाई पीडामै राख्नु कतिसम्मको न्यायसंगत हो ?’ उहाँले प्रधनमन्त्री दाहालप्रति प्रश्न गर्नुभयो–  ‘पीडितलाई पीडामै राखेर हिंसा मच्चाउनेहरु सरकारमा उहिले नै गइसके । १८ वर्षअघि शासक भइसके । पीडित जस्ताको त्यस्तै । डेमोक्रेसी कांग्रेसलाई आयो हामीले देख्यौँ, तर घाइते, अपांगलाई आएन । हामी संक्रमणकालीन न्यायका कुरा किन उपलब्ध गराउँदैनौं ? 

एमाले  संक्रमणकालीन न्यायलाई छिटो यथोचित ढंगले टुंग्याउने पक्षमा  रहेको अध्यक्ष ओलीको भनाई छ ।